【當消費變得政治．政治也被消費】
一，近幾個月，消費的確少咗。一來自己生活態度改變，二來亦冇乜心機。冇心機消費，我諗都有唔少人有同感，所以唔多講。
二，心態上嘅改變，好大程度上來自習慣上嘅改變。咁啱我四月底開始咗改變飲食習慣；唔知大家有冇聽過 Keto Diet ，四個幾月來，我除咗減成四十磅，最大嘅得著就係專注力好咗，而且開始意識到，大多數時候，我哋感覺餓，係出於習慣多於真正嘅需要。一個正常人需要嘅熱量同養份，原來並唔多，而且可以用好少錢滿足得到。
三，改變飲食習慣之後，連其他消費習慣都改變埋。不過，我再強調，我並唔係反對消費，但更加意識到好多消費慾望，原來真係一剎那嘅衝動，同埋真正嘅需要，原來真係唔多。
四，有一日，忽然有個感悟：消費可以令人得到滿足感，不過創造生產都可以有滿足感。兩者最大分別係，前者被動，後者主動。
五，當然，我亦都唔排除，有人認為消費可以好主動，創造生產係被動；但我嘅觀察係，呢種人唔易滿足。
六，自從六月初爆發流水革命，香港又再一次壁壘分明。最初都唔係同黃藍區分，但好明顯呢兩隻色嘅符號意義一早深植群眾嘅集體意識，搞搞下又變返黃藍之分。
七，我諗呢個版多數讀者，都係黃，甚至有幾位都幾深黃。不過，我都發覺偶爾有藍朋友造訪。呢度嘅光譜之闊，反映有啲話題，就算大家冇共識，但都有機會接受分歧，agree to disagree 。
八，當一個社會得返一隻色，唔理係黑白黃藍紅，其實都幾得人驚。當然，我哋每個人可以選擇去同咩人做朋友，甚至做生意，唔啱聽唔啱傾，無理由迫自己迫人，好無謂。
九，應該由吉野家事件開始，就有人話要抵制藍店。有同事問我：「你點睇呢種因為政治立場而起嘅商業抵制呢？」
十，吉野家呢，其實由於我嚴守 Keto ，甚至有諗過要試下食素，所以無論點都唔會幫趁。Keto 其實都有多少嘅政治，當然個論述複雜少少，有機會再分享。但我想講，人一日得廿四個鐘，胃就得一個，錢亦都有限，點都會作出取捨，呢個就係自由市場嘅基礎。咁，唔同嘅消費者，憑自己嘅判斷去消費，甚至叫埋人去一齊支持或者杯葛某間商戶，實在無可厚非喎。正如之前所講，如果連呢個自由都冇，就真係得人驚。
十一，不過又咁講。假如要問一個絕對咁理性嘅消費者，佢應該點樣揀幫趁邊間鋪頭，我覺得總冇理由單憑政治立場去做判斷喎。
十二，得罪講句，雖然話唔少小店泛黃，但亦唔可以排除有人扮黃。至於財團連鎖店，藍色背景固然唔少，但大家又係咪真係知道，佢哋老闆唔係因為白色恐怖無奈扮藍呢？
十三，唔好唔記得，大家話抵制吉野家之前，曾經一度以為呢間嘢係「黃」。當然，可能係負責玩 Facebook 班後生仔先至係「黃」，老闆係「藍」，但邊個講得實在，究竟邊個立場先係扮出來？
十四，扮黃扮藍，假如出於理性計算，咁對做生意嘅人來講，失去嘅係經營成本，得到嘅就係所追求嘅回報。微觀層面睇，其實冇乜話啱唔啱，但從宏觀嘅角度分析，呢種將政治立場都消費埋一份嘅現象，最終有乜結果呢？
十五，某個鄰近國家，做乜都要政治正確；任何人，任何機構都要跟主旋律。響呢種風氣嘅影響之下，不但政治理念意識形態扭曲，甚至乎連市場社會文化都扭曲晒。
十六，讓政治的歸政治，係唯一嘅出路。有人話：「有咩唔政治呀？」對唔住，呢個真係並非一個健康社會嘅常態；衡量一碗牛肉飯嘅價值，應該睇佢好唔好食，有冇營養，甚至隻牛點養出來，啲米點種，都講得通，亦多少都有啲政治意味；但消費嘅，係老闆嘅政治理念，不了。
十七，問題係，北京以為冇政黨政治，冇議會政治，以行政吸納政治，就可以冇政治。結果，政治唔單止走向街頭，更加走入商場。作為一個自由市場嘅信徒，見到呢種情況，都咪話唔擔心。
十八，我諗大多數人都會希望社會回復正常，但何謂正常呢？之前嘅香港唔完美，之後嘅香港，亦唔會係完美，但何請正常呢？原來，正常，又或者常態，意思就係共識之下嘅基本設定，default 。隱隱然間，好似「乜都係政治」漸漸變成常態。
十九，鄰國嘅一黨專政無法接受自由社會嘅政治，甚至相信只要透過國家機器控制意識形態、思想、價值觀等，就可以經營一切，擁有全部。
二十，至於個人層面，一個人越清楚自己嘅需要，自主自決嘅能力亦越大，越免受環境影響。
常態意思 在 Gavin職場英文- [張凱閔解釋笑梗] 如果你看懂這張圖，應該也會 ... 的必吃
[張凱閔解釋笑梗] 如果你看懂這張圖，應該也會會心一笑~ normal 是「自然」、「正常」的意思normal distribution 就是機率統計裡的「常態分布」 paranormal ... ... <看更多>