［古惑仔Online］（＊）拿，咪話只係掛住Patreon寫冧把自吹自擂銅臭啦。我其實係一個文青。殷海光話齋定時定刻我就收復返啲失地。
TLDR：黑手黨2012年都搞Facebook Page了。不過Admin老謀畀人拉咗，坐三十碌，而家冇人update．
告個急先：本人已被炒，未訂嘅記得訂Patreon，積小成多呀。訂咗嘅可以考慮加碼（https://bityl.co/4Y0h）。當然我唔係坐定定「我不想努力」，一星期至少出返六篇文，仲要之前有啲讀者贏到下錢嘅（但本人目標唔係玩畀冧把，係更高層嘅嘢）
1. 意大利有個 FB Page，叫做Honour and Dignity（意大利文係 Onore è dignità，「所以係讀安娜唔係韓娜」）（不過意大利文Hospital 係Ospedale，英文就照發H音），早前下咗架，都18000 like，多過埃汾。佢run咗五年，我就四年半，明顯都係佢勁啲。
2. 點解下咗架？因為個版主畀人拉咗去坐30年監。目測年紀都唔細，餐壽酒應該在赤柱擺。不過意大利嘅嘢。你懂的。
3. 講返，版主叫做Vincenzo Torcasio，有啲名氣。「維基百科有嘅就係有名氣」，雖然係佢嘅社團，唔係佢本人。個社團就叫'Ndrina Torcasio。佢就係話事人。黑手黨呀小朋友。（https://bityl.co/53sa）
4. 問題就嚟啦，由於個Admin本人2017年拉咗去坐監，又似乎冇得用Facebook（原來意大利都好嚴謹的說，因為高度重犯，30年喎），又似乎冇交低畀另一admin（＊＊）。所以個Page一路閒置，呢排先被要求下架
5. 講時講，人地真係算走在時代尖端。咪話2017年已經拉咗，但搞咗5年？即係2012年已經開Page，比埃汾早咗兩年（＊＊＊）
6. 至於個Page貼乜架呢？梗係唔係出Post 叫你劈友或者老笠。原來都係 brand building，加啲content marketing．意大利式長輩圖，貼下風景貼下花，貼下大作家嘅名句，或者古惑仔智慧（「如果一個人，做緊一樣野既時候，好唔專心咁望住你，咁佢就係臥底啦」）
7. 當然，幾十個Post當中，就有一個你睇到「有啲嘢」。例如定時就會攻擊下意大利政府嘅反黑條例咁。「即係香港01嘅玩法」
8. 專家話，黑手黨當然都要與時並進。如何低調但又踢到人入會？用social media就fit晒，而且又夠針對性，可以專揀某個地區某個年紀（唔通七十歲先入黑社會？），亦都唔貴（＊＊＊＊）
9. 黑手黨都要品牌？梗係要。唔止係因為要招新人。仲有，品牌可以減低成本。咩成本？開拖劈友淋紅油斬人地隻馬個頭之類嘅成本。睇教父都知咩係an offer he can't refuse啦。但不如計下數，你飛呀Tom Hagen過去，仲要搵幾件蛋散去斬馬（唔通Tom Hagen自己做？），都幾係嘢。下下打打殺殺點掂？
10. 你睇所有黑社會片都話你知，時代唔同啦，咩都係生意，企業化，規範化。有品牌有乜好處？就好似有核武咁，「你知我唔好惹」，唔係二打六，你唔敢玩嘢唔還錢—而正係呢個震懾效應，就避免咗真係要搵幾十人劈你，好貴的說。果然和平係戰爭帶嚟，「感受痛苦吧，體驗痛苦吧，接受痛苦吧，了解痛苦吧。不知道痛苦的人是不會知道什麼是和平。」
11. 以前嘅黑手黨一樣玩呢啲嘢，但有個矛盾。一方面佢地做Personal cult，好多少年因為崇拜大佬入黨（即係見到陳浩南「巴閉，英雄主義」咁）。問題係出咗名，又會畀政府搞。所以你睇American Gangster就同你講the loudest one in the room is the weakest one ，低調啲，唔好畀人知
12. 講真你睇下，高調嘅古惑仔，由卡邦到灣仔之虎到崩牙駒（戲都拍埋！），邊個唔係最後出事？（＊＊＊＊＊）
13. 咁如何可以低調地，唔出真人名，但又做到Brand building？就係靠digital marketing 啦！你唔使知我係邊個，明嘅自然明，到時有小編InBox你。斷估唔使留言「Mafia」
14. 其實講咁多，政黨都係咁玩法啫。不過係合唔合法咁解，或者用吾友李兆富嘅講法，「奪咗權未嘅分別」
15. 不過成件事最錯就係個Admin本身衰謀殺，坐咗30年監。個Page就咁GG。所以搵個後備Admin都好重要。雖然我又懷疑，坐30年監啫，唔係死刑嘛，照計有得探監，講個Password都得掛？可能係新任辦事人唔再玩呢樣東西，回歸傳統方法—定係去Instagram 抖音？
（＊）開頭諗住篇文叫 “Face黑雞毛”，然後忽然閃過「古惑仔online」呢個題
（＊＊）呢個就唔多好啦。等於之前埃汾Personal Facebook 被ban，都仲有個分身可以在呢邊出文 甚至落廣告
（＊＊＊）不過埃汾嘅作風宿命似乎都係：唔會係最先嗰堆，但又唔會遲到散場連美點雙輝或幾個橙都冇得食。好多東西都畀我食到一浸。包括做金融，搞Facebook Page，搞Patreon，以及搞移民。
（＊＊＊＊）有機會我要寫文講，但感覺香港普遍風氣幾抗拒在Facebook 落廣告。你個人MK文學專頁就冇所謂，但想賺錢嘅KOL，或者中小企，而你本身又唔係多人識嘅，我唔明做乜咁抗拒。以前呢啲中小企都係畀啲淺濕鳩傳媒濕鳩公關架啦，但叫佢一萬幾千落下Facebook 廣告好似要佢條命咁，日日就上網屌話朱生壓低佢啲reach．請循其本：內容越嚟越多，大家Timeline就得咁多位，時間亦只係得咁多。個organic reach當然係跌。咁你唔科水嘅，咪接受自然定律。當然你係周秀娜你係LV咪可以唔使玩呢啲遊戲。講真，你Facebook落廣告，斬晒啲公關呀 marketing budget都仲得。
（＊＊＊＊＊）我諗起「鬼添」，可以大搖大擺出真樣上一仔做訪問，仲不忘影埋佢枱面本Economist，成件事十分痴線。聽講仲話有MBA，仲教記者英文：once in a blue moon．真係咪講笑，大把大學生都唔識。
你嘅2020年點？我嘅2020年就幾好。Ivan Patreon，港美市場評點，專題號外，每日一圖，好文推介。每星期6篇，月費100唔使，4個月已1000人訂！（https://bityl.co/4Y0h）。月頭訂至抵，年費仲有85折，仲係睇13個月添。
