23.6.2018 @ on.cc
廚神上身 宋熙年挺肚教整家鄉煎魚餅
藝人宋熙年（Sarah）同陳智燊（Jason）嘅youtube channel一向都深受網民歡迎，不過Sarah依家身份有變，有咗BB，令一班網友都好擔心會唔會以後冇片睇，但係大家可以放心，Sarah同Jason會繼續分享佢哋嘅生活點滴，大家仲話依家係睇埋Sarah嘅懷孕點滴，直到佢嘅BB出世，真係好窩心呀！
呢日佢哋就教大家點整家鄉煎魚餅，皆因Sarah話又香口又好味，最緊要陳生好鍾意食，老婆喺鏡頭前咁講，Jason都冇得say no，笑住話係。作為孕婦，飲食就更加要注重，特別係水果，所以Sarah係咁介紹平時佢食嘅水果，不過Sarah就好搞笑話：「呢度係咁細個，澳洲係咁大個呀！唉！I miss Sydney！」
到煮食部分，見到腹大便便Sarah廚師上身，細心介紹食材，做助手嘅Jason仲嚟個低抄角度影住Sarah個肚，佢就話：「咁樣就可以睇到Sarah同BB仔，係咪超正先？」見到Jason真係好期待BB來臨。之後Jason幫手切嘢，唔畀老婆操刀，驚佢整到，見佢好快就成身大汗，你估煮嘢咁易咩？兩個仲分別比賽睇吓邊個煎得好味，但係Jason就煎到奇奇怪怪，不過就算老公整得點都好，Sarah都大讚啦！呢啲咪就係愛囉！好多網民睇完都話佢兩個溫馨程度爆燈，簡直係最佳夫妻拍檔呀！
網民有話兒：
TICVX NMXX：最鍾意睇佢兩個。
QIOXX VIXX：依家睇埋Sarah嘅懷孕點滴，好Sweet!
KIZB GISX：Sarah煮（廚）師上身，煮得一手。
UILK NNCX：兩個溫馨程度爆燈，閃爆!
