【 電視史話第卅一回／佳視結業40年 】
40年前的今天，廣播道五台山上風起雲湧！
1978年8月22日，香港第三間免費電視台佳藝電視因財困突然結業並即時停播。翻開1978年8月23日在《華僑日報》刊登的新聞內容：「昨晨七時佳視大廈（即現在的香港電台廣播大廈）貼出通告，雖然下大雨，仍有數十名職工圍觀，貼出之通告，長兩呎，闊一呎半，用膠袋封好，原文如下：『本公司因經濟陷於困境，由即日起停止營業，至於職工之薪金，將依公辦理，務求迅速解決。至於有關進度情形，將另行續步通告。佳藝電視有限公司，一九七八年八月廿二日。』佳視於昨日凌晨四時決定停止營業，此時大門已上鎖，鐵閘用粗鎖鏈鎖着，職員均無法進內。」
大概就是這段「鎖門」時間，文雪兒跟劇組仍然在拍徐克的揚名作品《金刀情俠》（有說是《風雷第一刀》），她早幾年接受甘國亮主持的《亞視百人》憶述（http://bit.ly/2N6rJfL）：「嗰套劇，有個火災現場，當晚就爭啲燒親人，因為我哋係拍外景嘅佈景，其中有個火場，咁個攝影師就入去拍啲碎景，其實（範圍）唔係好大，但你都知道啦，你喺外景啲火係好難控制，嗰晚黑我記得係好大風，（感覺都差唔多燒到埋身），結果到佢要出到嚟嗰陣時，真係佢要出嚟嗰個位呢，度門就嘭（跌）咗落嚟，咁佢就好辛苦，我哋都好多人幫手，我見到有好多人幫手，就救咗佢出嚟，但佢隻手都已經係燒親吓。」
文雪兒直言當晚回憶很深，因為那夜就是佳視最後一夜：「結果嗰晚我哋通頂㗎，仲要係好凍，好大風，我最記得，咁瞓醒一覺之後就接到個電話。」原來是陳寶儀打來的電話（陳寶珠之妹、羅樂林前妻），話筒傳來對方大叫「妹妹呀！」（妹發音咩），因為文雪兒是全台上下年紀最細的，「所以全世界都叫我做妹妹㗎，佢話，妹妹呀，公司執咗笠呀，我話唔好玩啦，我啱啱先通頂返嚟，點會啫？佢話真㗎，你睇電視啦，咁我話，是但啦，由得佢先，因為當時接受唔到，同埋真係好攰，咁就準備再瞓啦，收咗線，隔咗好短時間，好似差唔多係接住，電話聲又響，我哋係麗的電視，我係竇漢勳先生（麗的高層），高亮叔想搵你一齊出嚟傾傾偈。」
文雪兒說，自己從小到大都看高亮叔做節目，知道他是麗的藝人，所以知道這個並非騙財電話，但隨即問：關於咩㗎？竇氏回應，不如出來之後再詳談吧，「我知道自己失業咗十分鐘左右啦，然後就出咗去見佢哋啦，我最記得，當時佢哋拎晒Contract出嚟畀我簽㗎，即刻簽㗎，我話可唔可以諗吓先？佢哋話，唔好諗喇，因為後尾我哋先知啦，原來係個挖角潮嚟㗎，當時如果佢哋唔搵你呢，TVB就會搵，我唔知佢哋（TVB）有冇，只係睇吓邊個先。」結果文雪兒和鮑漢林、米雪、馬海倫、伍衛國、余安安、羅樂林、黃韻詩等轉去麗的，而鄭裕玲、楊盼盼、劉丹等則去了無綫。
到底為何佳視會結業？其中一個原因是長期積弱（黃金時段播放教學電視），荷包向來缺水（前後投資達4000萬），後來邀請周梁過檔，重金製作「七月攻勢」是致命傷，但其實另外一點是比較少提及，就是港英政府是另一「兇手」。再看《華僑》報道：「林氏兄弟（已故恒生銀行創辦人林炳炎之子、 前佳視老闆林秀峰、林秀榮）即使再欲增加資本，亦因限於政府所定無論投資多少，亦祗能佔有百分之十二點五股權的條件之下，無能為力。」佳視回天乏力，後來變成麗的VS無綫／亞視VS無綫的定局，長達38年，直至2016年及2017年ViuTV和奇妙電視相繼開台，香港才再次出現三家電視台的局面。如果說香港電視長期出現一台獨大的問題，港英政府當年其實責無旁貸。
我知，大家可能奇怪，為何我又要講佳視，Who Cares佳視結業40年？送上甘先生在同一集《亞視百人》所說的話：「點解我要猛講佳視呢？事實上，（因為）佳視呢好似係喺我哋嘅電視史上挖空咗，無端端被挖咗一筆，唔見咗，有好多嘢又追唔番，講又冇人知，睇又冇得睇。」如果我們不疏理、認清歷史的來龍去脈，我們就會「迷路」，而香港的電視製作，其實已經迷路很多年很多年了。
（22082018）
＊＊部份佳視劇集現時可於 myTV SUPER 點播收看。
＃游大東 ＃游大東影視筆記 ＃佳視 ＃佳藝電視 ＃電視史話 ＃文雪兒 ＃甘國亮 阿果 月巴氏 / Work Super Guy 方俊傑 金成 快樂的 思想。隨筆 講劇大時代 威哥會館 光與影的集體回憶 Kam Kwok Leung 鄭裕玲 Dodo Cheng 守下留情 X 亨恒勤一 專頁 Edward Lam 周梁淑怡 William on the way 明周娛樂 MP Weekly 明周文化 MP Weekly 舊時香港 殘の香港娛樂誌
