讀者投稿《講極唔聽奶奶篇》
6299係福建人，來香港差不多40年，仍不懂講廣東話。99幾十年埋頭苦幹努力搵錢俾62賭錢，傳統鄉下婆，覺得只要一家人齊齊整整便足夠。過時過節都唔會放假，博命做；我老公咁大個仔一次生日都無同佢慶祝過；細個時糖都無粒食，好多我地既兒時零食佢都無試過。。62周街大耳窿數，俾我老公電話&公司資料（國際知名企業）做擔保。每次大耳窿搞我老公，我老公大發雷霆要62躝返鄉下，99只會哀求老公唔好怪個老豆。我老公最後更因為公司俾大耳窿騷擾覺得無地自容而辭職，放棄高薪厚職。
之前老公大學畢業已急不及待租屋自己住，因為頂唔順家人的麻煩&唔夾，但還是很孝順，會定期返去食飯的。到儲夠錢買樓後就識左我，我地好快結婚同住。 婚前老公已俾我知道佢家人背景，但我個人非常重親情，所以婚後都好雀躍多幾個家人。但誰不知我一年內已經可以對佢家人極度討厭絕望⋯⋯ 當佢地係家人更加唔洗諗。
話說婚前我係6299屋企坐，佢地開始討論以後點叫我。我所有家人親戚都叫我英文名或「X賢」，我話不如叫我X賢喇，99話唔識廣東話（其實佢識d，但懶，所以佢直接講福建話，然後我老公翻譯）我話「咁一個音簡單d，叫賢算啦」99居然話福建話無廣東話「賢」呢個發音，好難叫，就用福建話叫我「亞賢」，而我咁大個女就無端端多左個名叫「牙蜆」。我心裡面其實好唔開心，覺得好核突好無歸屬感。佢地臨走仲笑住叫我要開始學福建話。（我當時未憎佢地，所以一笑置之。而家諗返，當然想叫佢地吔蕉）
婚後每次上去食飯，佢地都會提生仔。（呢個係我開始反感既轉淚點，因為我同老公拍拖時已講好唔生bb，佢認同，我地先結的）有一次我頂唔順就同老公講，話如果佢地再講我就唔再上去。佢地真係繼續講，所以我就無再跟老公上去食飯了。我個人係認為，基本感情都未有，就不斷叫人生仔；我唔係生育機器，佢地唔係豪門，生唔生唔到佢地講。
到我真正開始避開唔再見佢地，係婚後大概四個月，我地屋企又收到62大耳窿既大字報，今次張紙寫埋「新抱 XX賢」我老公見到後嬲到震，話要去砍62！ 個爛賭鬼應該係從請帖上得知我全名，然後急不及待咁交俾大耳窿。我唔知咁做對佢有咩好處，我只知道佢真係好賤，累完個仔想害埋個新抱！如果佢知道我電話及公司資料，我下場應該同我老公一樣！而且人生第一次見到自己個名同大耳窿掛勾，真係嬲到出煙！所以跟老公一齊鏟上佢屋企鬧爆佢！當時99一直企旁邊，間中就叫我坐，好似完全唔當一回事咁，真係好智障。
跟住99知道我地唔會再上去佢地屋企，就開始自己走上黎我地度，最慘係唔會通知聲，自己踩上黎，我非常唔鍾意；老公唔係屋企時，我直情唔開門扮唔係屋企。再跟住就開始發現佢偷偷地係我地屋企門口拜神！要知道而家既樓宇一定係唔俾點香燒嘢的，同佢講左以後唔好咁做，居然仲可以再捉多幾次，係講極都唔聽既鄉下婆！
到上年我有左BB，雖然意外但都開心接受。俾99知道後，佢就係我地門口拜神拜得更密。已經軟硬兼施話真係唔拜得，佢亦每次都話真係唔會了。點知BB出世後，有人天蒙光起身餵奶，又聞到燒香味！我或者荷爾蒙影響，即刻著曬，叫醒老公，一齊鬧爆佢，但佢仲一邊聽一邊繼續拜。我嬲到搶左d香衝入廚房淋熄佢....... 當晚佢再不請自來，知道我地好嬲，所以話一定一定唔會再黎偷偷拜神。我亦趁機講多次，唔好無端端上黎，要打個電話先。因為我成日餵人奶，唔著衫；無端端門鐘響會嚇親，佢亦應承了。
一個禮拜唔夠，佢又無打電話就上黎；我果吓崩潰了，決定唔忍了。當時間屋除左老公，仲有我媽我家姐，我完全無俾面99，鬧到佢走，真係唔發火以為吹佢唔脹！
之後佢個半月無上黎，最近上黎兩次都有打電話了😂 點解d人咁犯賤，係要人同佢where爛塊面先安樂！？
＃我的極品四大長老
大耳窿英文 在 「大耳窿」英文點講？ | By Old Man Andrew - Facebook 的必吃
「 大耳窿 」 英文 點講？ Said Rhili Rhili. 52 Views · 1 · · · Pages. . Other. . Fan page. . Old Man Andrew. . ... <看更多>