《小學校規，明顯係逼你犯規》
當我仲細個，一個豆丁嘅時候，首次明白「法」呢個字並唔係因為法律同法官，而係「校規」。
正所謂「國有國法、家有家規。」
所以校都有校規。
而近排天氣凍咗，
自然會聽到唔同家長講討論學校嘅「衣著政策」。
例如低過十幾度先可以著綿襖、
幾多度以上唔可以著校褸、
又或者係幾多度先可以著自己褸。
睇住一班小學生冒住寒風晨咁早碌返學校，
我就憶起自己小時候嘅悲痛往事。
今年就話冬天遲咗嚟，
但我細個就有一年係早咗到，總之有一日唔知做咩凍到飛天循地。
我當時覺得自己同身陷冰河世紀嘅西伯利亞虎&長毛象差不多，
都係等凍到瓜柴，變埋化石遺愛人間。
最慘當時學校有校規講明幾月先轉冬季，既然時辰未到，
即使寒風刺骨，都係著夏季校服單打獨鬥。
咁夏季校服係點嘅呢？
短袖衫同短褲。講完。
朝早嘅早會成班同學都凍到得返半條人命，個個練成寒冰掌。
而學生同家長都好單純，
就算知道堅凍，就唔敢私自著冬季。
因為驚，驚學校唔鍾意，因為校規有一條無敵條例叫「標奇立異」。
人人短袖你長袖，你就係「標奇立異」；
人人平頭裝你中長頭髮，你就係「標奇立異」；
人人隻手冇嘢你多條鏈，你就係「標奇立異」。
所以我哋好乖，個個都倒模一樣。
個個短袖短褲、個個短頭髮短指甲，呢啲就叫「整齊」，就係「校風良好」。
好弱智。
但個社會好Buy。
當時仲有條校規係
「學生唔可以帶多過10蚊現金返學」。
講真，唔係個個住附近、又唔係個個有錢搭校車。
我係跨區學童，稍為懂事時(約小四)，已經自己搭車返學。
淨係回程巴士都5蚊，
即係我一日可用現金就係5蚊。
衰啲講句小息買個「媽咪麵」就可以宣佈破產。
面對呢種條例，終於逼到一班同學犯法，
大家因為約咗放學去食老麥，所以帶咗三十蚊返學。(嗰個年代老麥廿蚊有交易。)
當日一見到老師就驚到面都青埋，好似殺咗人咁，實在係好傻好天真。
最後當然冇事，我哋亦都發現根本冇人會查銀包。
呢條校規純粹「擺喺度」，
平時唔會用，但一旦出咩事，校方就可以冠冕堂皇咁送個缺點畀你。
簡單講就係學校啲例好多時唔係「校規」，
而係一個「頭盔」。
平時唔理，必要時可以大條道理。
同「不誠實使用電腦」一樣，都係咁高深莫測。
其實「法」係死，「人」係生，你哋身為教育工作者，就唔好咁Q古老啦。
唔好令社會出現「帶十蚊返學嘅人」同「15度都著短褲嘅學生」，OK？
當個個都大褸加身，遵守校規嘅人先係「標奇立異」。
你嘅權力由人民賦予。
冇班學生，你甚麼都不是。
Ig: cheungson88
