評《陽光兔仔兵》 - 彩色的黑色幽默 母子情誼催淚細膩
陽光兔仔兵之中嘅得意仔POV，世界色彩奪目鮮艷，人物個個帶點漫畫味道。然而喺呢浸天真糖衣底下，仍然難掩戰爭同獨裁嘅殘酷，啲污糟邋遢嘢只係暫時掃晒入梳化底，喺兩粒鐘內暫時被縮細。天真爛漫 vs 慘無人道；可愛 vs 殘暴，呢部彩色的黑色幽默電影，高明地以喜劇嘅荒謬，突顯咗現實中戰爭嘅荒謬。
戲中兩母子之間嘅情誼拍得真摯細膩。今日唔知聽日事嘅設定，親密且巧妙sweet爆嘅互動，加上Scarlett Johansson同小主角嘅高水平演出，令呢對雙依為命嘅角色溫馨催淚。呢一段濃濃嘅母子情誼，絕對帶住成部陽光兔仔兵嘅靈魂所在。
講到演員，必須一提配角Sam Rockwell。佢飾演被納粹軍唾棄嘅酒鬼潦倒軍官勁級賤格，長期講嘢一舊舊，對人呼呼喝喝；但係內心嗰陣濃濃嘅人情味真係隔住個mon都聞到。Rockwell才華橫溢，角色深刻；鬼哥會繼續追看佢嘅戲。
導演Taika Waititi處理喜感笑位非常純熟，鏡頭對白精準篤中觀眾笑穴。而且節奏仲有啲周星馳嘅影子，鬼哥相信就算Taika唔係fans，都必定多少受星爺作品影響。
其實電影反戰嘅主題從來只係晃子藉口，鬼哥認為陽光兔仔兵係一個感染力極強嘅單親媽媽故事。納粹時代背景不但催化悲涼無奈嘅無力感，獨裁恐怖主義更加突顯咗兩母子相處每一刻嘅珍重同寶貴。
鬼哥俾84分。
2020年暫時最高分電影。
#陽光兔仔兵 #JojoRabbit #ScarlettJohansson #TaikaWaititi #希特拉
20th Century Fox
