【電影吹水潭】
未看《金都》，先看了《歎息橋》。這是我繼《2月29》後第二套看的VIUTV劇集，故事有趣，亦有追看性，但同時劇集問題亦多。
優：
．大橋。
大玩重複但細節各異的情節的確實有趣，創造了好多可能性。而且，那絕非為玩而玩，而有配合劇情需要。嗰份心思係花工夫的。（我唔肯定有冇其他劇/ 電影咁貫徹玩過相類結構，印象深刻嘅係Him/ Her，但都未玩得咁深入）。另外，年輕版故事寫得幾好，同大人時空平排，睇得出前因後果；
．演出。
個別演員演出值得加許，幾名年輕演員幾好（雖然其實有幾位都差不多30歲，不算年輕。
劣：
．鏡頭。
大多係為撚而撚，好難睇。型式化構圖而沒有調度配合，其實無乜意思（留言有例子）。另，林保怡成日獨自坐喺餐廳嘅鏡頭真係...只可以話，夜更看更獨自發呆唔係美感；
．選角 。
Cast大人/年輕版配搭，年齡錯晒，痴晒線。如果係刻意嘅試驗，咁呢個係失敗嘅，可一不可再；如果係以為咁無乜問題，咁實在太輕視casting 呢門專業。另，好多演員都無乜突破，例如係我鍾意嘅岑珈其，又係做呢類角色，其實佢係咪仲適合做學生呢？；
．演出。
係有個別演出幾好，但亦有好多好平庸。林保怡嗰種「戲骨式」演出我好怕睇；伍姑娘頂唔順；周家怡始終無星味；唐寧咁多年仍然無乜進步；
．劇情合理性。
可能相對以上幾點，呢個非最大問題，但係
最阻礙到觀影。劇入面好多誇張化嘅人物描寫（例如Ken 個極嚴老母）/好容易寫嘅戲劇化設定（例如Kevin 患絕症/Catherine 情緒病），都仲可以隻眼開隻眼閉，但係套戲仲有好多唔太合理嘅情節，就睇得好唔舒服。
例如，一個拖咗n年唔還錢嘅人會因為畀Thomas 踢咗一下J就走去還返20萬畀Sammy；
Catherine 明知老公返黎，點會唔同Ken 單聲，等佢買埋外賣上黎自己發現？除非佢地有仇啦。
Catherine 明明係事業型女性，點會願意做一個燒酒吧嘅樓面？呢種女人咁有pride，就算佢得罪晒全行金融業以後無得撈金融，佢寧願唔做都唔會走去做個waiter啦；
大橋雖好，但細節夾硬黎/ 求其寫。雖然因為當下時空喺呢個故事設定入面無一個絕對現實，而只係一個主觀性嘅現實，所以好多事情都有空間去詮釋。但係咁並唔係理由去忽略細節嘅重要性。感覺上編劇可能唔係好夠時間去顧及細節嘅合理性。
大概係咁。等睇埋《金都》再講幾句，依然期待。
周家怡j 在 周家怡 的必吃
周家怡. 44 432 J'aime · 231 en parlent. 香港演員，熱愛演戲工作接洽，請聯絡ANGEL ... 周家怡和ViuTV《反起跑線聯盟》劇中兒子Billy（徐立德）出席品牌活動，家怡 ... ... <看更多>