有日，我岀完藥俾位小姐後，坐喺候診大堂嘅伯伯好好好細聲咁自言自語。
我同小姐一齊望向伯伯，發現伯伯條灰色褲由褲檔位至褲腳都有水漬印⋯
小姐立即急急腳離開診所，坐喺伯伯身旁嘅姨姨就講：「未見過人瀨尿咩！雞咁腳咁走！大驚小怪！」然後姨姨再講：「我岀去先啦，得嘅打俾我嗌我返嚟呀，成陣味！」
我見到姨姨都走埋，就鎖咗診所門。
我拎盒紙巾俾伯伯，佢一直低頭講：「唔好意思呀，唔好意思呀⋯」
我邊講邊幫手抹：「冇事喎，好小事咋嘛～」
伯伯：「唔好意思呀，我自己嚟得啦，整污糟你呀，我自己嚟啦⋯」
我：「兩個人兩對手，快手啲喎⋯」
無論點抹點印，灰色褲上嘅水印都仍然好明顯，我望住一臉尷尬嘅伯伯，想像到如果佢就咁行岀街，會受到幾多注目⋯
我：「伯伯，你⋯想唔想做醫生呀？」
伯伯望住我：「咩話？」
我：「我俾件醫生袍你著住走呀？型仔喎！」
伯伯望望自己條褲：「唔駛啦⋯」
呢個時候，有人chok診所隻門。
我開門後，見到係頭先走得好急嗰位小姐⋯
佢企喺診所門口遞咗個膠袋俾我：「你幫我俾佢呀～」
我擘一擘開個膠袋，拎岀入面嘅嘢望，係一條褲。
我：「啊！多謝你呀～你要唔要自己俾伯伯呀？」
佢：「唔駛啦，多個人佢仲唔自在呀」
我：「多謝你呀，你超級好人呀！」
佢笑笑點頭就離開了。
我拎住條褲同伯伯講：「你仲做唔做醫生呀？唔做就入廁所換褲啦～」
伯伯望住條救星褲笑了。換完之後，發覺褲腳⋯短咗啲啲啲。
我：「哇，型喎潮喎，而家啲韓國明星都係咁著！」
乾爽哂嘅伯伯手插褲袋擺pose引我笑完，又再坐低等見醫生。
不過⋯伯伯，你條底底呢？哎，唔理啦！
救星小姐，我衷心多謝你。
#我完全唔記得咗姨姨 #之後俾姨姨炳我唔記得咗佢 #吹咩吹呀吹波波呀
