呢個Weekend將所有香港嘅工作暫時放低，去左台灣渡假，不過體育人就算放假都係同運動分唔開，其中兩日都去左睇HBL。今年我係連續第二年同Mediators隊友去到台灣睇HBL (台灣高中籃球聯賽)，多得NIKE 我都有幸可以見識呢個咁正嘅賽事。
或者有人會問:「高中水平比職業或半職業水平低，有咩咁好睇呀?」
答案好簡單 - 熱血。
沒錯，SBL水平無疑較高，但嗰份拼搏同歸屬感一定比學界遜色，畢竟學生係柴娃娃日練夜練，一齊讀書一齊生活，經歷緊人生最真摯、純樸既時光，而家齊心向共同目標進發，嗰股力量、熱血可想而知。大家仲記得今年NIKE全港學界精英賽嘅規模同形式嗎? HBL在各方面都震撼得多，唔係話香港嘅唔好，只係台灣球迷比香港更投入籃球，而且比賽地點係台北小巨蛋，可容納15000人，主辦單位又有多年經驗，現場氣氛可媲美NBA賽事，強勁音樂、中場遊戲唔在講 (因為有台灣著名DJ謝明宏做MC)，現場亦有booth發售印有幾間高中校名或口號Tee，當地人著住黎睇波更投入更有歸屬感。
講返比賽，女子組冠軍戰係爭取衛冕嘅淡水商工對南湖高中，淡商兩大主力可以話屈晒機，身高1米83嘅中鋒吳侑萱拎左22分11籃板，而後衛彭曉彤全場3個三分球、攻入22分14籃板6助攻，最終69:49擊敗南湖高中再度封后，同時贏得隊史第九個冠軍，認真威水。
而男子組係大熱嘅松山高中對南山高中，比賽比預期更緊湊，焦點已經唔再係舊年高國豪同高國強，高氏兄弟對決，而係兩個高佬，松山2米05嘅孫思堯對南山2米03嘅吳沛嘉。得17歲嘅孫思堯一路以黎基本上喺內線玩晒，但南山憑住移動極快嘅團隊防守，仲有雙搭吳沛嘉同黃建智一齊招呼孫思堯，搞到佢進攻無啖好食仲好早三犯，其他松山球員又無乜手感，特別係罰球命中率其低(好似我咁)，半場南山已經37比24領先。雖然第三節松山打返出水準，後場嘅高國豪、丁聖儒、陳健銘輪流有返手感，但係好幾次關鍵時候，南山呢邊有關達祐同吳季穎撐住，仲迫到松山喺落後三分最後一擊時失誤，結果爆冷贏64:56。南山曾經喺今屆八強以4分飲恨(佢地八強唔係淘汰制，係打單循環晉四強)，今年終於復仇成功。
我自己本身無話支持邊隊，只要比賽好睇就得喇，今年同舊年都係咁精彩。
羅馬非一日建成，台灣籃球有今時今日咁勁唔難理解，有完善嘅制度，HBL到大專賽，大專賽後參加SBL選秀大會，而且家長、學校以至成個社會風氣都好支持學生打籃球，見佢地一星期可以練到六日波，每日兩課你就知點解佢地近十年籃球發展得極快。攞香港黎比緊係無得比，而且唔公平，始終環境因素唔同，但我覺得香港絕對可以以台灣借鏡，如今年學界精英賽，已經係一大步，希望有朝一日，香港嘅學界比賽或者其餘賽事，都可以做到貼近嘅水平。
香港，加油！
#HBL #台灣高中籃球聯賽 #Bringyourgame #Mediators
