台灣風格嘅籃球，一向被外界認為：基本功扎實、防守拼命、節奏明快，當我呢幾年睇過HBL，同參與埋今次Nike All-Hong Kong Camp 2018 Coach Clinic，就會明白箇中原因，以及佢哋成功之道。
首次設女子組嘅Nike 籃球營為期五日，邀請咗普門高中冠軍教練廖哲億、永仁高中教練時超傑以及4名隊員嚟到香港，頭3日聯同香港女子學界精英球員一齊訓練，最後兩日就有兩位教練，以及協恩中學冠軍教練任明敏(Dora) 分享帶隊心得同訓練示範。
短短幾個鐘嘅練習，可以睇到台灣教練分配訓練內容同時間恰到好處、指示清晰、要求高兼著重細節。連同小弟之前暑期班代教時，帶隊同一間國中（即中一至中三）打過友誼賽，發現台灣籃球幾樣趣事同特色：
- 每次練波，一開始起碼花上最少一小時做防守步；
- 著重講嘢、溝通、互相拍手鼓勵，試過有個隊員少出聲，教練要佢對住幅牆數100秒先准練波；
- 練波有「講嘢」環節，全隊用10分鐘喺球場唔停咁傾計，乜都可以傾；
- 球員服從性極高、有禮貌，永無駁咀扮球星；
睇落呢啲嘢好似好簡單，但我都幾肯定香港喺呢啲細節位做唔好。
身材輸蝕，態度搭夠，呢個就係台灣籃球，或者東亞地區球隊嘅要素，從小就咁規律，每次對練習都咁認真，正好解釋點解中華台北目前喺亞運以全華班都五戰全勝，嚟緊30號準決賽鬥中國，誰勝誰負打過先知。
講返教練呢part，香港咩景況呢？若果你係籃總註冊教練，初、中、高級教練都好，每年必須出席只有兩個時段選擇的「温故之新」分享會（Miss咗就唔畀註冊），顧名思義，即重温一啲嘢，而嗰啲嘢叫「球例」，近年更加少咗急救、體適能訓練等等分享，嚴格上嚟講可以叫做「教練球例班」或者「球證教練交流會」，唔係話唔好，但教練教學呢？訓練示範呢？以我成為註冊教練約6年來，未見有咩突破。何不花上少少錢，邀請台灣又好、內地也好，職業聯賽或學界層面嘅教練或訓練員分享同示範，比起「齋坐」3粒鐘更有意義。
以往都有教練交流活動，但呢次Nike 舉行呢個較大規模嘅教練交流課，絕對難得，唔少教練都紛紛喺課後向台灣教練請教一番，互相學習，態度正確。
球員打法在進步，教練都要進步，香港喺各方面比起世界籃壇落後起碼10年，而家科技發達睇YouTube係有幫助，但實戰講解同分享肯定事半功倍。戰術及打法無好與壞，只有適合與否；作為教練，我覺得只要懷著互相學習嘅心先有進步。
共勉。
#NikeAllHongKongCamp2018
#CoachClinic
台北 球場 球證 在 台北高爾夫球場會員2022-在Mobile01/PTT/Yahoo上的體育 ... 的必吃
台北 高爾夫球場會員2022-在Mobile01/PTT/Yahoo上的體育賽事討論內容，找台北高爾夫球場董事長,台北高爾夫球場收費,高爾夫球證值得買嗎在YouTube影片與社 ... ... <看更多>