呢兩日facebook最熱烈嘅專頁新聞（我唔講我自己啦，畢竟我熱烈就梗架啦～），莫過於專頁史檔出書《區區有故講2之大灣區編》，出新書記招先發現原來係689旗下圈傳媒嘅專頁。老婆餅無老婆、西炒飯無西，但史檔入面原來全部都係屎。
鬧人嘅野我唔講啦，我份人咁厚道，仲要陽光正面積極，所以我都係讚啦。我讚呢個page隱藏得非常好，講下歷史，三扒兩撥避重就輕，仲唔講明唔講政治。親愛的，講歷史但唔講政治的難度，比起講大灣區唔講689更難。到底有咩歷史和政治無關？最近史檔成日講動畫和劇集，難道你又認為娛樂和政治無關？七十年代被禁播的日本幪面超人，劇中的壞人集團就是叫做「震旦幫」（不是震蛋幫，想歪的都給我去面壁），震旦就是中國古代的一個稱呼。《再見螢火蟲》講嘅係戰火連天的日本、《抗日奇俠》講嘅係一群正在對抗日歷史高潮的震旦人（喂！！）。
你話，歷史點可能同政治無關？
即係咁，人妻先生開個專頁黎成日讚自己靚仔、廣告界的人開個專頁黎評廣告，最多都係老黃賣瓜，自賣自誇，大家講下笑下就算。但如果一個有政治背景或任務的專頁去講歷史，就好大問題。因為歷史是很容易被遺忘、也很容易被扭曲的。這幾年的政治活動，「起義」和「暴動」，我們記得清楚，但下一代呢？三十年後的人呢？大抵只會是中史書裡的一句：香港回歸後局勢不穩，曾發生XX暴動。然後，就完了。歷史完了，這個世代也完了。所有資料本來都是中性的，但在細心剪裁後，自然可以帶來另一個完全不同的解讀，更不消說，只要加上「可能」、「懷疑」，就可以隨心所欲地漂白染黑。
之前好似有人成日話我紅底組織的董事（好吧，我承認被人叫董事是有點爽到，嘻嘻），又話我同689關係密切。我想講呢，唔好侮辱投共陣營，你見唔見到人地史檔請人「編輯」，仲要慌死唔夠串，括號「多名」？請幾條友返黎，就係每日出三幾個post，你叫我呢個（被稱）投共兼同689關係密切嘅死八婆情何以堪？我一篇文like又多過佢、engagement又多過佢，但我一個編輯都冇！係咪應該俾funding我請四條大洋腸黎服侍，不，黎做編輯呀？我都可以同佢地日日瘋狂拍片，晚晚重演八國聯軍船堅炮利侵我大中華的歷史，我ok架！一諗起呢啲國仇家恨，我又喊濕一包紙巾（唔係咸濕呀，你班友面壁啦！）。駛好似依家咁折墮，寫文係我、fact check係我、搵圖係我、回留言私訊係我，block班智將都係我咩？
咳… 講完低能野，我地講返正事：紅底陣營所做的事，比你和我想像之中還要精密和仔細，史檔可能只是冰山一角，最令我在意的，是編輯職責範圍裡的「須與通識活動統籌組合作，製作通識教育內容」，我嗅到可疑的味道，有冇記者朋友想跟落去？
#我自己都唔知原來我個陣營咁把炮
#係嘅話我使成L日俾讀者捉我寫錯字咩
#咁人地得一個人之嘛
#我知你地唔介意幫我執字嘅
#介意也沒辦法
#反正我不介意你們介意
#死蛇爛鱔模式啟動
