*嚴禁劇透*
*粗口自行過濾*
*可瘋狂話戲屎但免外表批評人身攻擊*
·
[立即重溫][第2集 – 鬼子母神]
https://viu.tv/encore/dark-city/dark-citye2gwai-ji-mo-san
·
[1230隔夜超短劇評][ViuTV][黑市 EP02][鬼子母神]
·
[讚] 今集故事舖排同埋分布好過第1集好多。第1集頭半係捱落去，但今集每節都有吸引力令我追落去。演員整體亦都比第1集好得多，做石榴媽嘅資深舞台劇女演員、舞台劇最佳女主角（悲/正劇）得主陳桂芬做得真係好好，半集劇都係睇佢表演咁濟。對個仔又愛又恨又擔心，全部演得啱啱好。開頭有佢帶動氣氛，其他幾位演員出場又互相配合，喺演技方面今集睇得滿足。
·
[彈] 故事方面嫌佢好多嘢都太著跡，包括咗無啦啦講「我喺長沙灣做清潔」、「你男朋友我係做小說家」呢啲對白真係好突兀。喺煎釀三寶檔嗰幕，檔主其實可以輕輕帶過一句唔知你講乜就可以，唔使講話你聽到啲乜，之後仲要畀個shot畀部CCTV。如果呢個係伏線就太明顯，之後遇返檔主畀段CCTV片觀眾睇就明啦。
‧
如果當係hint畀觀眾知道石榴媽係鬼嘅話，咁魏醫生懷疑石榴媽係鬼嘅部分應該再放前少少，或者喺呢個hint之後再寫啲嘢去擾亂觀眾到底係有姐姐鬼定係佢阿媽係鬼。依家咁快就知石榴媽係鬼，懸疑感無晒，驚嚇度又唔夠補，中後段開始頹咗。
‧
「鬼子母神」其實要解釋嘅話，可以用多啲小說家男朋友嘅角色啦。最容易最老套就講佢都寫緊鬼故做緊資料搜集，言談間講吓個傳說，好過到最後嗰幕先一吓過爆出嚟，講多個食飯，破壞晒個氣氛。嗰啲理性分析腦部情況或者係想syn返魏醫生對呢個世界嘅理解？但呢個係鬼故嘛，講得通就okay啦唔使咁強嘅理性分析。
‧
或者咁做係想話畀觀眾知劇組搵咗好多資料去support個故事概念，但如果出嚟到係擾亂氣氛節奏嘅就應該減咗佢，呢個係劉翁、王貽興影像故事嘅通病咁濟。如果減走呢啲分析，係咪會睇唔明呢？或者調轉問，有咗呢啲分析，會唔會幫助觀眾理解？我認為兩個問題嘅答案都係否定嘅。
·
[演員表] 陳桂芬 飾 石榴媽 / 陳郁憲 飾 石榴仔 / 蔡宛珊 飾 魏醫生 / 陳子豐 飾 Roy / 葉萬莊 飾 小食店長 / 林俊傑 飾 業主兒子 / 卓茜 飾 兒童病人家長母親
·
·
#1230隔夜超短劇評 #ViuTV #黑市 #王貽興 #SunnyLau #劉翁 #陳桂芬 #陳郁憲 #蔡宛珊 #陳子豐 #葉萬莊 #林俊傑 #卓茜
