昨昏 kap 兩位台語前輩鬥陣去參加 #十二年國民基本教育本土語文課綱草案 ê 公聽會，以下是博萮 teh 會中 ê 發言，有一部分因為時間關係（每一人只有 3 分鐘）無法度全部講了，嘛會將遮全部 ê 意見用文字 ê 方式提供予主管單位
▌頭一步 咱就 ài 為咱 ê 母語正名
台語就是台語 台語毋是「閩南語」、毋是中國的「方言」
所以統要緊的 就是 ài 棄捒以「中國」為中心、正統 ê 思考方式 kap 立場
追伸：若是客家族群對「共台語叫做台語」有意見、認為客語嘛 ài 稱呼做「台語」，嘛歡迎客家族群朋友去訴求對《客家基本法》來修改 in ê 語言名稱
▌第二
既然這馬《國家語言發展法》已經通過，咱就 ài 挕hìⁿ 捒用中華話做思考基礎 ê 心態，像咱逐个人手頂這幾本，是按怎毋是直接用台文、客語文、原住民族語文來書寫? 表示咱主管機關 ê 心態，猶是用中華語為頂位基礎 teh 思考，毋管是用漢字抑是羅馬字，若是連主管機關攏無能力來用全母語思考，咱欲按怎來教育咱 ê 囝仔、欲按怎要求教學 ê 老師? 若是驚講有人看無，應該就 ài 準備對照版本
▌第三
本土語言教育無應該是基本教育 ê 附屬品，應該是主體，一禮拜一節這款設計是絕對無夠--ê ，真正想欲改善這馬母語流失 ê 狀況，應該 ài 鼓勵 teh 咱 ê 教育體系中設置全母語學校，位幼稚園、國小、國中、高中高職到大學等高等教育，所有 ê 科目攏直接 ài 用母語來上課，毋管是社會、自然、抑是數學，甚至是英文，攏 ài 用母語來教學，無免感覺這無可能，人香港就是按呢 ê 教育環境，這部分嘛需要對教師訓練開始做起
咱這馬有真濟家長拼命 leh kap 細漢囝仔講台語/母語，但是紲無法度連結學校教育，囝仔一旦去學校上課，就變做全中華語 ê 環境，而且嘛無法度使語言閣較進步、學生嘛無會當對話 ê 對象，因為自校長、老師到同學，全部攏是使用中華語，按呢毋管課綱按怎修改，攏無可能補救
▌第四
我嘛會當了解，現階段欲達成我頭前講 ê 目標猶 ài 時間，咱現階段會當先做--ê ，除了有通過語言認證 ê 學生應該 ài 佇升學考試、國家考試、公務人員考試加分鼓勵，甚至 ài 設計用母語出題 ê 考卷，來予已經有相當程度 ê 考生來進一步加分，增加學習 ê 動力，嘛會當為培養未來用全母語教學 ê 科任老師做準備
▌第五
針對 teh 校園內底母語使用無友善環境，主管機關應該 ài 提供申訴、救濟 ê 管道，來改善使用母語無自由 ê 狀況，主管機關嘛應該 ài 提供校園各種本土語言通譯 ê 資源，予各族群的自然語言會當自由流通
▌第六
針對學科術語、專有名詞、新 ê 名詞，咱政府應該 ài 有一个專門 ê 本土語言委員會來研究、發布，予本土語言嘛會使綴會著時代 ê 進步，有一寡字嘛會使直接使用外來語 ê 原文，予咱共世界流通會當閣較利便
追伸：像今仔日的場合，應該 ài 每一種語別分開開會討論，因為每一種本土語言拄著 ê 狀況攏無仝，應該針對個別語別 ê 需要來探討較著，時間嘛會閣較充足；若無至少 ài 為無仝母語的使用者準備通譯，予每一个人使用母語攏會當感受自在，毋免因為驚講有人聽無，就被迫 ài 用所謂「共同語言」、放棄/犧牲使用家己母語 ê 權利 kap 機會
【十二年國民基本教教育本土語文課程綱要草案草案北區公聽會】直播：
［第一段］
https://www.facebook.com/FishSun.tw/videos/783641449117743/
［第二段］
https://www.facebook.com/FishSun.tw/videos/3414412775283055/
#母語復振 #母語正常化 #十二年國民基本教育 #課綱 #本土語文 #台語文 #客語文 #原住民族語文 #國家語言發展法
十二年國民基本教育本土語文課綱草案 在 十二年國教總綱修訂宣導影片（總綱概述＋國中小） - YouTube 的必吃
十二年國教 總綱修訂宣導影片（總綱概述＋國中小）. 782 views 2 years ago. 十二年國民基本教育課程綱要 研發與實施之資源平臺. 十二年國民基本教育 ... ... <看更多>