📘
#再入睡前交換日記
0927《Together》
離開香港兩星期，主要係出席非常親愛嘅朋友嘅婚禮。作為扮工作狂，好少放咁長假，我啲假通常係安排到星期五飛、星期一返，即刻做節目，去製造冇放過假嘅錯覺，不過放兩星期，係冇得扮，但係都一路諗住有咩錄到返嚟咁，咁難得去一個英國農場風嘅婚禮，一定會有啲難忘嘅回憶嘅！
我懷住記錄嘅心情去出席朋友嘅婚禮，職業病，何時何地都想問啲嘢，錄低啲嘢，本來諗住問嚟到嘅賓客，佢哋結婚啦喎，你仲係單身喎，可唔可以自己檢討一下呢？但係後來好似嚟到嘅賓客都成雙成對，如果要問嘅話，只能夠自己一個人答晒，就好冇癮，講真，全場人都好感動嘅時候，得我自己一人喺度懶搞笑都好懢尬，於是我想問下啲傳統啲嘅嘢。
我問新郎：「聽日就要結婚啦，有冇心情緊張呀？」新郎話：「其實都冇乜好緊張吖，結完個關係都係一樣㗎嘛。」都係嘅，你愛一個人愛到盡先結婚吖嘛，咁結咗婚suppose喺愛錫對方力度上，你係冇得超越㗎嘛，新郎係建築師，答案相當有結構性，但係咁樣答，聽眾係唔會收貨，亦唔可以算係一句soundbite，係唔可以剪出嚟做promo嘅，於是我再問新娘：「聽日就結婚啦，有冇咩好緊張呀？」新娘話：「冇嘢緊張啦，係啲姊妹好緊張。」巴閉，王上唔急太監急咁話喇，佢都啱嘅⋯⋯我地全部人都好緊張，新娘係書法家，似乎對聽日簽嗰個名相當有信心，正確嚟講，應該話佢對自己嘅選擇，相當有信心。
雖然佢地答得簡單，其餘嘅嘢都好似係我夾硬塞落去咁，因為其實一個婚禮，兩個人嘅關係，係唔需要帶俾大家一啲咩意義。
就係咁，喺佢兩個都冇乜緊張，又冇乜嘢想發表嘅情況下完成咗個婚禮，冇表演，冇乳豬，冇狂換衫，冇紅豆沙送。不過齊晒人，夠晒開心，夠晒祝福，總之，夠晒皮。最後，婚禮之後嗰日，我分別問新郎同新娘夠唔夠開心，夠晒，咁OK啦。
分唔到係兄弟定係姊妹嘅 Ning
