*嚴禁劇透*
*粗口自行過濾*
*可瘋狂話戲屎但免外表批評人身攻擊*
·
[立即重溫][第1集 – 碟仙]
https://viu.tv/encore/dark-city/dark-citye1dip-sin
·
[1230隔夜超短劇評][ViuTV][黑市 EP01][碟仙]
·
[讚] 鬼故總有吸引力，喺聖誕節正日首播都冇阻觀眾收睇意欲，喺TG group大家熱烈討論。第一集玩大家耳熟能詳嘅碟仙，啲畫面又拍得幾靚，係啲鬼異嘢出現時嘅特效差啲，不過預咗佢細budget所以接受。
·
演陰陽眼彩鳳嘅麥可怡發揮得幾好，佢畀阿茜上咗身之後拗晒柴真係好得人驚，成集演得有變化，同埋佢應該有留意到自己嘅情緒同表情，喺呢集瘋狂插敍嘅情況之下，剪埋一齊都唔覺佢有乜唔接，反而其他演員（同埋導演組）冇乜留意到，一剪埋好多時啲情緒表情動作就跳晒。
·
我鍾意最核心嗰個布局，原來碟仙係阿茜，然後佢想返返轉頭拯救同學，等佢哋唔好玩碟仙玩死自己。
·
[彈] 一個鐘單元劇，最慘係太多嘢想講。頭先話我最鍾意個核心布局（嗰個應該係核心啩），但只係用咗唔夠半集時間去講。如果將發現阿茜係碟仙呢件事放喺第一節完第二節頭，我諗會好啲，至少唔使阿茜最後搞咗一大輪，之後一句話試咗108次都冇用就當交代咗。將前面男女同學之間嘅愛慕、阿茜同梅老師嘅師生感情、校長同梅老師同楠楠嘅從屬混亂關係、阿忠唔抵得阿茜成日成為焦點，全部放返喺阿茜repeat想救大家嘅時候先一一揭開，就算同依家一樣係得把口講，都應該會好睇啲。依家開頭交代咁多瑣碎關係有啲悶，而且同之後repeat救人嘅發展冇乜關連，失望咗啲。
·
知道王貽興同劉翁成日都好想向香港鬼怪片致敬，但梅老師嗰個白臉紅衣綠燈我覺得太老套，反而唔太驚。同埋有啲對白真係唔使講出聲，阿茜最為嚴重：「原來我係嗰隻鬼」、「原來係我殺嘅？」呢啲都可以刪減，氣氛會好啲。
·
第一吓玩碟仙個鏡頭搖到我有啲暈… 同埋點解學校會有金塔蓋嘅？
·
·
[演員表] 關嘉敏 飾 茜 / 麥可怡 飾 彩鳳 / 邱士縉 飾 忠 / 戴月 飾 楠 / 呂爵安 飾 周鎮東 / 何嘉怡 飾 鬼魂茜 / 陳澄騫 飾 梅老師 / 劉家儀 飾 女校工 / 陳鳳珍 飾 校長
·
·
#1230隔夜超短劇評 #ViuTV #黑市 #王貽興 #SunnyLau #劉翁 #關嘉敏 #麥可怡 #邱士縉 #戴月 #呂爵安 #何嘉怡 #陳澄騫 #劉家儀 #陳鳳珍
