「你一個四十幾歲嘅男人咁唔成熟，行到呢一步先同我講話唔去Final Interview，你知唔知我幫你安排咗幾多？你其實有冇心想轉工？你覺得自己有冇問題？你都知道你自己幾難搵工，而家有好機會你唔好好把握？你係咪男人？垃圾！」
因為Candidate WhatsApp 封鎖了Joanne，又唔肯聽佢電話，Joanne無可奈何地只好利用電話訊息去作出最後的呼喊。
一個非常之罕有嘅職位，配搭一個全香港少於五十個的求職者，加上疫情影響，造就了今次咁瘋狂的、咁無厘頭的甩單。
客戶係Joanne的大客，一間本地上市公司，好難得可以有一個Exclusive職位開俾佢做，又好難得搵到一個好適合嘅求職者。經過三輪面試之後，其實第四輪Final Interview已經係一件「做吓門面」的Final Interview，事實上，HR已經和Line Manager溝通好，如無意外，Final Interview當日已經可以出到Offer。雖知道呢張單價值$300,000，係呢個時勢特別顯得矜貴，淨係Commission都可以有六位數字，所以，Joanne用咗好多好多心機係這張單上面。
求職者方面，叫Raymond，年約45歲，有20年工作經驗，20年之內做了10份工作，最近三份都係短期合約，自己心裏面非常想找一份穩定的工作，入大公司，轉返做長期合約。其實如果照住履歷表咁樣睇，任何一間公司都比較難考慮，因為太Jumpy。但係，基於依個職位實在太難搵人，尋找了超過一年以上，加上Joanne極力推薦，所以客戶都盡力去推。因為疫情關係，所以面試都要在家中進行，經過三輪Zoom面試之後，最後一輪選擇用電話和CEO交談。
呢個時候，問題來了，原來Raymond一直都未有填Application form(職位申請表格)，一般情況，求職者都會係第一輪面試當日已經要填好。因為疫情問題，填form變得唔係最迫切，通常HR都會要求後補。係依個個案入邊，HR曾經多次提出要補返職位申請表格，Joanne亦都三番四次要求Raymond盡快填好，可是一直都未有收到，因為其實「只係一張職位申請表格」，所以都未有太過為意。
係最後面試三個小時之前，Joanne打俾Raymond。
Joanne：「Raymond，下晝就係Final Interview，準備成點呀？同埋之前叫你填嗰份表格今日可以比到我嗎？HR又再繼續催我Send俾佢。」
Raymond：「OK啦，呢幾日都好忙，冇咩點樣去準備。份表格未有時間填，同埋我冇Printer，印唔到出嚟，唔填表格得唔得？」
Joanne：「吓，如果你冇printer，點解之前你一直唔講，同埋又唔同我講，其實我可以幫你印出嚟，因為真係要交俾佢哋，請問你今日方便嗎？或者公司附近有冇文具舖可以幫手印同埋Scan？」
Raymond：「今日真係好忙，同埋公司附近有文具舖，但係上次問過都幾貴，唔想嘥錢。」
Joanne：「咁不如我印出嚟，直接約你出嚟拎俾你，你抽幾分鐘幫我填埋，跟住我幫你send返比個客可以嗎？」
Raymond：「今日真係行唔開。」
Joanne：「咁樣我幫你填，你轉頭將啲資料俾我可以嗎？我等你收工，你可以補番個簽名，跟住我聽朝幫你send出去。」
Raymond：「其實咁麻煩，不如算啦！都唔明做乜要填form！算啦！我唔應徵呢一個role喇，唔好意思，你幫我withdraw啦，拜拜！」之後便cut了線。
Joanne諗住打返俾Raymond，已經被佢block了，張到咗嘴邊嘅單就係咁白白溜走，好似望住啲錢跌咗落海咁樣嘅感覺。Joanne心入面十萬個粗口，好想親自上Raymond公司俾張Form佢同事轉交俾佢。
心諗：「如果張表格可以係電子版就好，唔使咁麻煩！無啦啦因為張表格少咗咁多Commission。」
在 2021 年的今天，愈來愈多傳統的 forms 已經被電子化，大公司的Application Form 亦採用 online submission 的形式，或者直接以 online application 所取替。不過，其實諗深一層，求職者都好有問題，如果真係想轉工點解唔肯盡量配合去填一份表格？Joanne又真係唔好彩，撞正疫情真係要Online做面試，雖知道而家唔係個個屋企都有部Printer同Scanner。至於Raymond，被Joanne的獵頭公司落入黑名單就梗㗎啦，Joanne仲未決定點樣同客戶交代：如果好人嘅話，就會同客戶講佢有新嘅Offer；如果衰啲嘅話，就直接同客戶講依個咁特別嘅原因，根據客戶的內部指引，這種求職者會被落入黑名單，唔單止間公司甚至附屬的子公司亦會收到。
呢件事其實雙方都有錯，Joanne太大安旨意；Raymond又真係唔係咁注重客戶嘅政策，白白浪費了一個令到佢履歷表洗底嘅機會。
🔎歡迎follow我MeWe & IG: Fulltimeheadhunter
