手拉腳撐～～～痾長啲呀 痾長啲呀 吸大啖啲 痾長啲
生仔種感覺返晒黎😭
唔係睇到篇文形容 我都唔記得我當時係產房點渡過
成個過程我都好努力忍 盡力留番啖氣等有需要時先叫（但反而被姑娘覺得我應該未痛到要生😓）
仲好記得未入到產房至入到產房但又要抽血 打針 簽呢樣果樣 幾廿百樣叫你做 但你自己亂到都唔知自己做緊乜簽緊乜
果種feel到谷到門口邊 但姑娘又未話可以開始 又唔可以痾出黎 又唔俾用力果下感覺真係好難頂
生果時大家士氣都好高漲 但生完個下 世界靜止咗 得番bb既喊聲
#不過生完先係地獄開始
#啲人話生完見到個女咩痛都會忘記
#但我產後一段時間都成日會嬲個女搞到我咁 😂
#不過依家我地經已冰釋前嫌
#邊個叫佢咁嗲咁可愛
#產後房班hihi我諗我呢世都會記得佢地把聲認得佢地個樣
係醫學院嘅尾聲，最常聽到嘅問題一定係「你有冇想入邊一個專科」。而好多人都會話，當你讀到個一科，你就會感覺到自己適唔適合。
讀到婦產科，小島學堂規定每一個學生都要去產房當幾次值，幫手接生，即係我地叫嘅「執仔」。試過自然分娩嘅女士都一定見過產房嘅戰況，而我都仲記得自己第一次當值...
一去到產房換衫，就見到助產士們圍左係護士站吹水，旁邊係一塊大過我屋企電視三倍嘅熒幕，上面寫哂產房而家有幾多個準媽媽係到等緊生仔、每一個人嘅基本病史、宮頸開左幾多度之類，有經驗嘅一望塊板就會知道大概仲要等幾耐。由於毫無起色，我都坐左係護士站發呆。
突然，電話響起。護士長聽完電話，企起身大嗌「對面推人入黎！SROM，fully，直入產六！」 (快譯通：穿左羊水、宮頸已經全開，由對面病房直送入六號產房），成班 HCA 同埋助產士就一齊彈起哂身衝去執嘢，係十秒內成個護士站無哂人，剩返我一個發白日夢發到流哂口水。
廿秒之後，電動門聲響起，緊隨嘅係慘叫中嘅準媽媽，同埋後面負責攞住所有嘢嘅老公。
「呀！！！！！！！好痛呀！！！！！！」
入到產房，HCA 已經較好床鋪好布，負責產六嘅助產士都已經著好哂全副武裝。媽媽一上到床，兩邊嘅護士已經捉住佢對大髀，兩腳一分，見到 BB 個頭頂已經到左門口。
有個剛剛入黎嘅助產士見到我就問：「點呀，攞左 consent 未呀？」
Dr Who：「點攞...?」
事關醫學生要觀察分娩就一定要先攞到老公老婆嘅許可，但老公而家換緊衫、老婆就嗌緊，旁邊圍住好多助產士...
故事去到呢到暫停一陣。每年去到八月呢個時候，各大學迎新營都會有活動，好多時候大家搭地鐵見到一大班著住同款 T-shirt 嘅學生跑黎跑去，就係參與緊其中。活動期間佢地好多「任務」，最常見嘅就係嗌口號，所以大家有時見到一班學生係天星碼頭咆哮、圍住金紫荊係到怒叫就係咁解。大家記住呢班熱血青年嘅情況，同樣嘅事，就係皇后醫院六號產房入面發生，只不過係熱血青年變左一大班女士。外星人黎觀察地球人一定覺得好神奇，點解會有一班人對住一個女士嘅陰部怒吼。
「手拉腳撐！下巴掂心口！拉呀！唔係推呀！」
「唔好嗌啦！忍住道氣呀！你下面都唔用力！」
「嗌無用架！痾啦！唔比抖呀！個仔都未抖！」
「痾長啲呀！嗌係唔會生到仔架！痾多下啦！」
「手拉呀！唔好扮矜持啦！有屎出都係要痾！」
「出黎見到頭仔啦！你咪放鬆！佢縮上去啦！」
呢幾句台詞，相信試過係本地自然分娩嘅媽媽都耳熟能詳。
婦產科係女士嘅天下，全個產房只有我同老公兩隻雄性生物。由於我地都係第一次見咁嘅情況，大家都係望住個 BB 頭頂發呆。呢個時候，助產士就咆哮。
「老公！唔好望啦，念力生唔到仔架啦！幫你老婆打下氣啦！」
「學生！幫手打氣啦！」
老公唔知做咩好，唯有幫老婆抹汗。
我都唔知做咩好，hang 左幾秒機之後只係講到一句：「呃...加油呀。」
「___！算啦你都係。」
「手拉腳撐！下巴掂心口！痾！！！！！」
助產士係助產期間，全部都會成為維園阿伯，好熱血咁大叫。更神奇嘅係，呢個奇觀只要個仔一出世，就會忽然完結。助產士變返哂做淑女，講嘢好斯文，執完手尾嘅又會返哂去茶房食薯片，留下一地羊水、一隻新鮮嘅異形、一個攰到無力講嘢嘅媽媽、同埋一個瘋狂錫緊佢老婆嘅老公（同埋一個唔知行去邊嘅醫學生）。
「BB 出世時間，下晝兩點三十四分。」
原來媽媽被推入產房到小朋友出世，只係六分鐘。
#DrWhoHK
🔻🔺🔻🔺🔻🔺🔻
Dr Who 開左個新 IG account
有興趣就快啲 follow 啦！
IG: DrWho.HK (instagram.com/DrWho.HK)
🔻🔺🔻🔺🔻🔺🔻
FB 逼到我地呢啲無比錢嘅 Page 消失
Reach 數越黎越低
所以大家 like 完 post
記得 like 同 follow 埋個 page
有興趣仲可以較埋 “See First” 就唔會 miss 嘢啦
