我嘅職業係：模擬市民（上）
如果要用一個詞形容我嘅人生，咁絕對係「平凡」。
畢業之後，我搵咗份工，做IT嘅，人工唔高亦唔低。
喺朋友嘅Party上識到個女仔，開始追佢，然後拍拖、求婚、結婚。
我哋一齊儲錢買咗層樓，當然好細間，但總算有個屬於自己嘅安樂窩。
故仔發展落去，應該係一個好悶好平凡嘅人生。
但突然有一日，我好記得係星期日，我一個人喺床上瞓晏覺，老婆就喺廳睇緊電視。
我瞓著咗，之後有啲急尿，我迷迷糊糊咁起身行去房門口，一摸門柄……個門柄唔見咗？
我睜大對眼睇一睇，唔係「門柄唔見咗」，而係成道門都唔見咗，間房個窗都唔見埋。
床依然係嗰張床，但我間房被四面牆圍繞，根本冇出口。
我以為我自己發緊夢，但捏咗自己幾下，感覺都好真實。
「喂，有冇人啊？救命啊！」
我拍牆大叫，但嗰塊牆好厚，我敲到手都痛埋，都冇任何反應。
我部電話又擺咗喺廳，一時間，根本冇辦法求救。
到底發生咩事？我只係瞓咗個晏覺，冇理由幾個鐘內，就有人可以拆咗我間房嘅門同窗，再起牆圍住我。
同埋就算有人做到，咁做有咩意義呢？既然有呢個能力，想隊冧我咪一刀捅死我囉，何必起牆咁大動干戈……
我思考咗好耐，都諗唔到答案。
時間一分一秒咁過去，人有三急，我已經忍無可忍，喺牆角屙咗一督尿。
但屙尿都係小事，重點係，我依加又餓又渴，唔知點算好。
我身邊只有四面牆同一張床，根本唔知時間過咗幾耐，亦冇咩可以做。
我只好攤喺床上，希望減少體力消耗，瞓得著就瞓。
我會唔會就咁餓死呢？唉，呢啲真係「閉門家中坐，禍從天上來」，瞓個晏覺都可以遇到莫名其妙嘅災難。
過咗唔知幾耐，房間內已經充斥住屎尿嘅臭味，但我實在太虛弱，又再瞓著咗。
到我再起身嗰陣，我終於見到房門！我間房終於回復正常。
我馬上衝出客廳，飲咗一大杯水，再食晒冰箱嘅嘢食。
我望一望日曆，離我「瞓晏覺」已經過去咗三日。
「你去咗邊啊，你兩日冇返工，公司係咁打畀你，我到處都搵唔到你啊。」
我指住間房：「我被困咗三日，間房四面都係牆。」
「被困？我哋間房嚟㗎咋喎。」老婆難以置信。
我問：「咁你呢幾日有冇入過房？」
「冇，我呢幾日都喺梳化瞓，點解我冇入過房呢？」老婆都陷入苦苦思索中。
呢件咁奇怪嘅事，我本來以為，我一定唔會諗到答案。
但我沖涼嘅時候，眼前出現咗一堆Code。
做IT嘅我，一眼就認得，呢堆Code係出咗Bug嘅意思。
我聽到一把男聲：「嘩，表妹，你玩《模擬市民》玩到咁癲嘅？起四面牆困住我隻阿俊。」
我心中一寒，因為我就係叫阿俊。
然後有把女聲回應：「係啊，呢個玩法喺網上學番嚟㗎。睇住隻角色急到瀨尿、餓到就死……幾好笑啊，哈哈哈。」
下集：https://bit.ly/3arBrqK
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #我嘅職業係模擬市民 #我嘅職業係
三番起糊玩法 在 冇刻子嘅糊牌。眼可以係番子。 自摸 - Facebook 的必吃
香港〔麻雀〕 香港麻雀係麻雀牌嘅其中一種玩法，雖然同廣東麻雀差唔多，但係番種就少好多。香港好多人打三番起糊，之後全部都係計「例牌」，頂龍八番、十番或十三番。 ... <看更多>