[讀者投票決定未來]
《仆街！一唔小心跌咗入戀愛育成嘅世界》 (5)
---------------------------------------------------------------
「我都好鍾意歷史嫁。」我答。
「咁就好喇！！」北條同學聽到之後好似好興奮咁。
課室裏面佢坐我隔離，背後係一扇望向課室外面嘅，天空一片藍色，遠處有好多幢灰色嘅樓。一幢一幢，豎滿煙囪。北條同學不斷咁同我講佢好鍾意蒼井老師嘅歷史堂。佢第時嘅夢想係做一個歷史學家，所以佢會好好讀書，考上東帝大。
「東帝大？」我問。
「嗯！東帝大。」北條同學好肯定咁答。
嗰日有歷史堂，班上嘅人各有各傾，直到蒼井老師嚟到，成班先至少少靜落嚟。
蒼井老師：「各位同學早晨。」
眾人：「蒼井老師早晨。」
真島組成組一排幾人一齊起身，同蒼井老師交帶咗聲：「我哋要去廁所」，就徑自行咗出去。佢哋經過一張又一張枱，無人夠膽多言，蒼井老師褪後一步，讓出一條路。
蒼井老師答咗一句「係」，就由得佢哋自己行出去玩。
全班靜咗幾秒。
蒼井：「咁我哋依家開始上堂啦。」
佢喺黑板上面寫咗幾隻字，佢話：「接續住上個學年嘅結束，我哋講完戰爭之前發生嘅事，仲有日中戰爭嘅戰爭初期......」
其實我對歷史毫無興趣。我之所以同北條同學講我好鍾意，純粹係為咗同佢加友好度。
蒼井：「咁我哋今個學年，就會開始講到第二次世界大戰嘅後期，同埋佢由日中戰爭擴大到世界大戰層面上嘅轉變。」
北條同學佢好專心咁聽書。但係周不時佢就會皺吓堂眉、轉下筆、專注咁望住黑板拎住枝筆但咩都無寫低過，顯得好吃力咁。但似乎係有啲乜嘢喺到認真咁思考緊一樣。
「北條，無咩嘢吖嘛？」我問。
佢搖搖頭：「無嘢。」
見佢咁認真上堂，我都無再同佢講啲咩嘢，剩係坐咗喺佢隔離，望住窗外面，而佢都無理到我。
蒼井老師：「全面戰爭，係一戰以後大規模國家戰爭嘅新概念，即係人類開始注意到戰爭需要動員一整個國家嘅人力物力，從工業力、生產力等等方面去全力配合戰爭嘅需要，而依種模式，本身就令到我哋日本難以負擔。」
除咗嗰啲豎住一枝枝大型煙囪嘅工廠，仲有一堆堆白色平房，窗口非常之細，一切都密密集集。一整片地佈滿工廠。
蒼井老師：「日本有大量軍需品需要喺東南亞地方運到本土，中間就要保持一條穩定嘅運輸補給線。單計日中嘅規模，運輸路線嘅保證並唔難做到，但係將佢放大到世界大戰嘅規模嘅話......」
川崎市，周圍都可以見到一堆重工業公司嘅招牌，佢哋嘅工廠同辦公室好多都放晒喺依個城市裏面。
蒼井老師：「美國會對日本造成極大威脅。」
雖然係咁，但依到嘅空氣仲可以咁好、個天仲可以咁藍，完全係科枝嘅力量。
蒼井老師：「日本首先突擊珍珠港，係為咗令到美國喺西岸嘅艦隊無辦法左右到東南亞到日本嘅航路。」
對住依堆工廠嘅另外一邊，就係我哋學校嘅後山，綠色一片，被住宅區重重包圍。
蒼井老師：「但日本同東南亞嘅連絡，縱觀成場戰爭，保護航路都成為日本嘅一大煩惱。中途島海戰一過，日本喺太平洋嘅海權優勢大大削弱。」
後山係學校嘅禁地，長期有保安巡邏，而且學校都會好嚴重咁懲罰偷走入後山嘅學生。所以好少人真係走到入去，而後山，亦到因為咁而變成好多學校鬼故嘅源頭。
蒼井老師：「日本隨後處於被動，只能採取守勢保持戰局，唯一可以寄望嘅，係戰爭轉成拉鋸戰、消耗戰，去同美國等國家進行談判。但消耗戰，同一時間都係對日本最不利嘅事。」
有人話後山係二戢時候嘅亂葬岡、有人話後山係秘密處決戰俘嘅地方、又有人話，後山係戰時一個做生化實驗嘅研究室......
蒼井老師：「而之後，我相信大家都知道，美國得到制空權，佢哋嘅飛機轟炸日本，仲有喺日本投下原子彈，日本隨後戰敗。」
都有人話，後山曾經有一個防空洞。
蒼井老師：「而川崎依個地方，因為近處東京，亦都係戰時一個重要嘅工業據點，到處都係為日軍提供軍需品嘅千工業工廠。所以，川崎因而成為美軍轟炸嘅其中一個目標。」
依個地方竟然會有段咁樣嘅歷史。
蒼井老師：「當時最受轟炸嘅地方，就係依家川崎站附近嘅地方，仲有......」
工業區背後有一片海，好似會閃住日光一樣，完全無法想象依個地方會變成一片頹垣敗瓦，周圍亮住火光，所有人都荒忙逃難...我完全想象唔到。
蒼井老師向住窗外：「依個臨海嘅工業地帶。」
課堂過咗大半，我諗應該就嚟落堂。我喺窗前面一直拓住個頭，咁樣望住窗外，睇住外面日光嘅嘅角度慢慢咁斜落。
蒼井老師佢話：「嗰日係1945年嘅4月15號。」
呯！
北條同學拍咗吓枱，直奔出班房。
蒼井老師：「好，我哋今日講到依到先。我哋落堂。」
我望向班房嘅門，北條同學未落堂已經跑咗出去。
「第二日劇情完結」
要讀取之前的遊戲進度嗎？
A) 第一日劇情
B) 第二日劇情
C) 繼續遊戲
--------------------------------
心心 = 讀取之前進度
哈哈 = 繼續遊戲
