《燒書》
♂：早晨
♀：早晨，尋晚學成點啊？
♂：我發現除左French Kiss之外，仲有好多用國家而命名既Kiss
♀：得，我知你想講乜，一朝早麻煩比我靜靜享受我既奶茶
♂：你知唔知你最吸引既地方係咩
♀：一朝早就想讚我，歡迎至極
♂：你係少數係呢種笑話入面會不置可否，識得留白既人，唔會太認真，又唔會太無知，又唔會太低俗，呢樣係我從來未見過既類型
♀：情侶之間，情趣好緊要，用你既語言，要保鮮
♂：咁你係一個好好既花王，係呢，你信唔信鬼
♀：你見過？
♂：無，我陽氣重，從來都未見過
♀：我覺得鬼只存在係人心入面，心中有鬼就會見鬼
♂：星期六晚，我會去燒書
♀：買唔晒都唔駛去燒書既，最多我幫你買喇
♂：唔係，我只燒一本，每年七月我都會燒
♀：比你心中既鬼？
♂：我老豆
♀：你絕少提到你家人，但你會為你老豆燒書，睇黎成家你同佢關係最好
♂：佢係唯一一個支持我寫野既人，我第一篇比雜誌刊登既文就係為佢而寫，亦係我第一篇真真正正為一個人真心而寫既文
♀：要懷念一個人，有好多方法，燒書又好，燒衣又好，燒野食都好，都可以係，最緊要係有心
♂：笑左……燒野食都唔錯，又可以懷念，又可以食野
♀：我唔相信有鬼，人死左如果有靈魂就應該有佢地應該去既地方，如果有輪迴，佢地應該去迎接佢地既新生命
♂：佢係自殺，無論係東方或者西方都好，自殺既人都唔會有好下場，係天主教入面，自殺既人唔可以上天堂；係佛教入面，自殺係大罪，會墜落到三惡道，下世不能為人；係道教入面，陽壽未盡而自殺，呢個罪孽需要用好多功德去彌補；伊斯蘭教中，自殺都係被視為不敬主，人係無權自殺
♀：自殺既人，認為死亡比活著更好
♂：的確……佢無必要受呢種苦，我見過佢係深夜入面偷偷係廚房喊
♀：但佢至少有一個理解佢同支持佢，仲會一直想念佢既仔
♂：我的確好掛住佢，其中一點我返黎既，都係因為想拜下佢
♀：如果你需要人陪既，我星期日可以陪你去
♂：算唔算見家長？
♀：你話係既，咪係，咁我都帶少少野燒比世伯
♂：有心，我諗佢知道我有人係身邊都已經好開心
♀：你有冇聽過人點解會有咁多苦難？
♂：請繼續
♀：我聽過一個好有趣既講法，其實人生就好似遊戲咁，我地曾經玩過簡單模式，輕易通關；然後挑戰困難模式，花左少少心思就通關，最後我地選擇地獄模式，可能就係我地依家經歷緊既人生，係我地自己選擇，亦係我地希望挑戰既
♂：你呢個想法同我一直以來聽到既完全係兩個概念，人要積功德，做好事，咁下世先會有好人生，按你咁講，即係我地想爭取係，係更困難既人生？
♀：因為挑戰，愈難得到既，就愈有價值，依家我地怨，只不過係我地飲既孟婆湯令我地完全忘記左呢個初衷
♂：我都聽過一個講法，每個人出世就已經有晒成個劇本，而我地係睇完個劇本滿意先會選擇呢一個生命
♀：係，我可以肯定，你選擇呢個生命既原因，係因為有我
♂：如果你知道我既人生係點既，你應該會知道如果我真係因為你而揀，你既價值可以話係無價
♀：因為人選擇一個困難模式，除左得到更大既挑戰性之外，更係因為困難模式入面會有更珍貴既寶物
♂：好似聽到心靈雞湯咁，咁我老豆呢？佢呢個模式之中又得到咩？
♀：我唔知，但佢一定得到應該珍惜既野，例如三胞胎？一個會為佢燒書既仔？
♂：佢……我知道佢既野太多太多……而我覺得暫時未係時候同你講
♀：咁到你想講既時候，我隨時都願意聽
♂：我好似想將所有事都同你講咁，即使我近乎對你一無所知……
♀：星期日，你將會開始知道我既野，到時我都希望你會一直聽我講我既野
♂：你曾經講過，比人知道自己既一切，就好似將衣服一件一件既脫去，然後變得赤裸，當赤裸之後，呢種赤裸就算你著返衫，都返唔到轉頭
♀：你想講，如果兩個人都變得赤裸之後，會唔會睇清大家之後，就去到盡頭？
♂：係，你既意思係咁，好明顯，但明顯依家我地每日都除緊衫，你明知結果係點，你都照做，咁就一定有原因
♀：係，原因係咩？
♂：呢個答案，我會係大家一絲不掛既時候，再親口同你講
♀：當大家一絲不掛既時候，最唔應該做既，就係出聲
♂：咁係你想聽既時候，我再同你講
♀：咁希望你可以比我想像中遲講
♂：今晚，我想要更多今晚
♀：咁我地都要好努力先得，用力好簡單，用腦唔簡單
♂：同你傾計，真係好攰，但同時好滿足
♀：可能唔止係傾計會咁，今晚講得太多，晚安
♂：我都需要回下氣，晚安
♀：地獄模式之下，最重要既係搵到一個好隊友，二人模式點都輕鬆過一人模式
——
長傾·不見 第一回 @筆友
https://bit.ly/LongchatEP1
長傾·不見 第三十二回 @電話
https://bit.ly/LongchatEP32
好久 不見 第一回@久違
https://bit.ly/LongtimeEP1
好久 不見 第十回@Staycation
https://bit.ly/LongtimeEP10
