旁邊那杯 scotch 是道具，跟對方聊到中途，拿起杯子呷一口，是型的。
但那杯 scotch 也有個實際作用，就是用來定驚。無數次用 Zoom 的經驗，也沒有一次像如此戰戰兢兢。
「Hi Marcus，」這個笑容很高貴，「幾好嗎你？」
看著螢幕上這位女士，緊張得連拿起杯子的力氣都沒有；我有可能是全世界第一個，用 Zoom 跟前度女友的媽媽見面的人。晚上十一時，一早洗澡了，但隆重其事是必然的，頭還是要 gel 得靚靚仔仔。
「Auntie 你好，」感覺到自己僵硬的笑容，「我 ok 呀，呢邊都仲叫安全，你嗰邊而家點樣？」兩老住在紐約，情況令人擔心，可幸伯母仍然精神爽利。
恰到好處的 small talk 之後，她有技巧地帶到正題，而其實那刻我還是不知道她找我所謂何事。「係呢，」她眉毛輕揚，「你哋...... 仲有冇聯絡？」問得咁直接，真係要飲啖酒定驚。
「間中都有 text，但係 COVID 之後好似都冇見過面。」想了想，她這樣一問，有點令人不安。「佢冇嘢嗎？」
伯母笑了笑，欲言又止，似在尋找適當的對白，終於：「我就係想你幫我睇吓佢有冇嘢。」好半天，不懂反應過來；想知多一點，但伯母似乎又不想說太多。臨睡前被這樣吊癮，十級痛苦。「I am more than happy to find out for you，不過好奇想問下，點解你唔問佢其他朋友，要問我？」
這次伯母答得爽快：「有時有啲嘢，佢對住熟嘅朋友都未必講，反而對住一啲無關痛癢嘅人，she might open up a bit。」有必要幫伯母澄清一下，其實她在美國接受教育，未退休前是華爾街一家大行的超級 banker，所以中文真係麻麻，「無關痛癢」四個字確是刺痛了我的小心靈，但我原諒她。
難得人家信任，我當然不會太慢，兩天後已經約了她在一家以前我們拍拖時候，喜歡 catch up for a quick lunch 的地方—— Chinnery。
著住一件姣姣哋淺粉紅嘅我，早到十分鐘，當佢嚟到，見到佢頭髮仍然係咁飄逸，嘴唇仍然係咁迷人，眼神仍然係咁高傲，但竟然著咗件深藍色嘅連身裙。十次有八次著深藍色，佢都係因為心情唔好。
「Dark blue？Anything bothering you？」
「好憎你嗰啲自以為事嘅所謂觀察力囉，叫咗嘢食未呀？」
女人話好憎，未必真係好憎，要聽埋語氣。佢語氣出賣咗佢，其實完全唔憎，而且有啲冧。
約會舊情人，最好約在老地方，為什麼？除了熟悉的氣氛，還有熟悉的經理。「Hello 葉生，Hello 楊小姐，好耐冇見你哋一齊嚟喇。」有啲對白，你畀定五舊水叫個經理講佢都未必交到咁真摯嘅戲，何況呢吓完全免費，老地方的威力呢。
Beef tartar 來到。蛋，落晒；酒，落一半。放在吐司上，goodness，是舊人的味道。
「估下我噚晚同邊個 Zoom？」
「Not in the mood for guessing，直接講唔該。」
「你媽咪。」
「你認真？」她咬著吐司瞪大眼睛的樣子超超超可愛。
「好認真。」
「佢同你講乜嘢？」
「佢叫我問你有冇嘢。」
「暫時冇嘢，」她定了定神說。
「咁到底你有乜嘢？」
「都話冇嘢咯。」
「喂，你兩母女係咪玩我呀，你知唔知我今日頭痛呀。」
「你頭痛關我咩事？」她竟然笑。
「我噚晚見你媽咪特登 gel 番個頭，你知我有 gel 喺個頭瞓唔到㗎啦，咪去洗頭囉，跟住求其抹幾下就瞓著咗，今朝就頭痛喇。」
她笑得更開懷，在袋裏拿了一盒藥丸放在枱上：「Panadol 呀。」
「For M 痛㗎喎姐姐。」
她笑得更起勁，我也被她感染了。一起傻笑了很久之後，才慢慢靜下來，默然回味著剛才的打鬧，至少我是，希望她也是。
已經沒有打算追問她什麼，反而是最後，那杯咖啡來到之後，她主動說：「係佢。」
Oh shit…
「佢出軌？」
她苦笑搖頭。
「唔係出軌......唔通出櫃？」
「好無聊呀你，」她隨手拿起一包糖向我擲過來。
「Then what is it？」
攪拌著咖啡好半天後，她才鄭重吐出一句：「顏色唔同。」
「Wholly shit…… 」
「原來有好多嘢，」她低著頭說，「我自己係唔知。」
「你之前唔知佢咩顏色？」
「知，一早知。我話我自己唔知嘅，係我唔知原來顏色唔同，可以有咁嘅 impact。」
我想了想，終於想出一句很型的對白：「人覺得唔知點算，唔係因為我哋有嘢唔知，而係有啲嘢，我哋以為自己知，但其實原來唔係咁。」
「Wow…… 」她看著我，「你係咪 quote 緊一個作家？」
「係，Oscar Wilde。」
她忍不住大笑：「葉生，it ain’t what you don’t know that gets you into trouble but it’s what you know for sure that just ain’t so，唔係 Oscar Wilde，係 Mark Twain 呀。」
「差唔多啫。」
埋單離開後，我的腳步很慢，在沉思。「仲有咩笑話想講呀？」她站在鏡子前面問我。
「唔係笑話想唔想聽？」我反問。
「請。」
「我想講：我同你，以前；佢同你，而家。」
「What？」
「即係呢，我上個禮拜日，同我老細喺 Grand Hyatt 食早餐。平時嗰度嗰個時間好靜，但嗰朝好多人，好嘈，因為 staycation，let’s put it that way，嗰啲唔係平時會喺 Grand Hyatt 見到嘅人。」
「你想講咩？」她不明白。
「你就係 Grand Hyatt，我就係平時 Grand Hyatt 嘅客。然後，我同你之前發生嗰件事......就係呢個 COVID…...佢...... 就係 staycation 嘅住客。唔想發生嘅嘢發生咗，畀人乘虛而入。」
「我未聽過咁荒謬嘅比喻，and that’s a very mean thing to say。」
「對唔住，it’s a mean thing to say but I say what I mean。」
「講嘢唔使咁坦白，」她盯著我說，「太坦白會傷害人。」
「香港人呢，已經唔可以每日坦坦白白講嘢，你係咪想我連對住你，都要講大話？」
她若有所思了一會，說了這樣一句：「Can you give me a hug？」
「求之不得，」我禽獸般撲過去。
「Not as what you think，」她退後一步，「but as 同路人。」
