繼上次冼師父同班江湖人士「維持秩序」驅逐法律超人謝偉俊後，今次估唔到到連Jason 潘焯鴻都加入埋康宏戰團，向佢襯家馬時亨挑機，呢壇花生真係永遠炒唔完。
基本上潘焯鴻係同冼師父一樣企響同富邦金有千絲萬縷關係嘅「台灣幫」一邊，認為成場康宏管理權爭奪戰入面，台灣幫先係真正想令康宏復牌，而深圳幫則係「不擇手段追求控制公司行政管理。」
佢嘅理由係康宏早前已公開咗2017年-2019年業績報告，算係滿足聯交所復牌條件嘅誠意一步；問題係「深圳幫」成員之一馬時亨，響呢個時候竟然同財匯局「官商勾結」，高調要求針對康宏進行業績報告調查，擺明就係要阻撓復牌云云。
拿對於潘焯鴻後半部份狂鬧馬時亨果Part，我對此係深表同情嘅，因為當日潘焯鴻擔當吹哨者果陣，馬時亨就正正係港鐵主席。中科被「坑殺」，肥馬某程度上係要負上責任，仇人見面份外眼紅我係絕對可以理解。
但對於潘焯鴻目前康宏管理層讚譽有嘉嘅言論，我就不敢苟同啦：
1. 潘生話康宏現管理層已公開2017–19年度報告，證明佢有誠意復牌──但偏偏復牌最重要嘅條件卻係獨缺一份2020年嘅報告。喺現管理層台灣幫領導之下，核數師換完一個又一個、AGM遲遲唔開、年報又遲遲都唔出，但又不停DQ人──即係霸住個屎坑唔屙屎，咁都話佢有誠意復牌？咁你不如當日港鐡高層都有誠意監督好沙中綫單工程啦
2. 潘生響文中強調康宏並非一隻爛殼，擁有幾十億元資產規模同營運，呢點我係非常同意。但問題卻係單單響2018同2019兩年間，康宏現管理層已蝕咗超過10億！然後再睇下佢地響呢幾年間分別做過乜：同士多（無錯，就係果間著名藍店）、GOXIP進行交叉銷售甚至入股──我想問呢樣嘢同康宏本業有乜關係？
當間公司蝕錢以10億計，而你仲走去不務正業，我就真係好懷疑究竟現管理層究竟係咪真係想復牌重新接受小股東監管……
3. 潘生指責馬時亨同財匯局「官商勾結」，徹查康宏業績報告係令到康宏復牌失敗嘅元兇云云。但唔該首先睇下，邊個管理層響之前幾年無所作為，去到最後一刻先交倒17–19年嘅業續報告，仲偏偏欠咗最後一年報告致令復牌臨門撻Q？再睇下成件事嘅關鍵業續報告究竟出咗乜嘢問題：
//雖然康宏已公布了2017至2019年度財報，惟負責的核數師「中匯安達會計師事務所」（下稱「中匯安達」）對該3份業績共給予25項「保留意見」……財匯局上月表示，就發表保留意見向核數師中匯安達展開調查，且明確稱，倘出現「重大而影響廣泛的情况」，核數師不允許發表保留意見。消息人士續稱，由於中匯安達須回應財匯局的關注，因而暫未決定是否為康宏2020年度的業績作審核。//
簡單黎講，到終於出到2017–2019年報，啲保留意見多到好似當年沙中線啲調查報告咁，你叫啲小股東點收貨？唔好忘記，收尾兩年完全係台灣幫話晒事，點解已經俾你話事，份年報都仲咁多保留意見？而錢又係繼續蝕得咁甘呢？
最後我想問，而家個問題究竟係財匯局強人所難，定係康宏而家盤數問題大到連核數師都唔敢揹鑊？潘生都係過來人，而家財匯局想查清楚核數師有冇問題，對尋找真相一定係好事，潘生有冇需要係咁幫台灣幫護航呢？係咪乜都唔使查，佢地話OK就OK ？
https://henryporterbabe.medium.com/%E6%BD%98%E7%84%AF%E9%B4%BB%E9%A6%AC%E6%99%82%E4%BA%A8%E4%BB%87%E4%BA%BA%E8%A6%8B%E9%9D%A2%E4%BB%BD%E5%A4%96%E7%9C%BC%E7%B4%85-%E5%BA%B7%E5%AE%8F%E4%BA%8B%E4%BB%B6%E8%AE%8A%E5%92%97%E6%B2%99%E4%B8%AD%E7%B6%AB%E7%BF%BB%E7%89%88-25e6a43cf68f?sk=0b00c1cc335c15b6139a8d80cc0bba32
goxip 在 Goxip - Home | Facebook 的必吃
Goxip | Fashion & Beauty shopping app. Snap.Shop.Wear. Over 5 million worldwide shipping products. Share. ... <看更多>