【Kongner編輯室】
瘋子愷：一場部落戰爭
從前有一個原始部落K，科技水平唔高，部落入面有部分成員識用魔法，不過成個部落入面嘅人普遍都熱愛和平，而且大部份人都好識自食其力，基本上三餐温飽係無乜問題嘅，所以一直以來生活算過得去。
而部落入面唯一令大家有些少在意嘅就係呢個部落嘅傳統。
根據唔知邊度定嘅傳統規定，酋長係需要透過世襲嘅方式產生，而現任嘅酋長由於自小身體虛弱，喺過去廿年都無為部落有過啲乜嘢大貢獻，一直就只能盡佢微薄嘅能力去調停部落成員嘅小糾紛。不過幸好嘅係，因為過去有住前代酋長嘅帶領，部落K喺呢廿年來先至過得咁平靜安穩。
好景不常，現任酋長喺未有任何子嗣嘅情況之下病死，因為無酋長繼承上嘅關係，部落群龍無首。而呢個時候，附近一個大部落G亦得知呢個情況，打算借機鯨吞部落K。而面對外敵進迫，部落K嘅成員就一致達成一個共識，就係既然呢廿年嚟酋長都無乜大作為，而大家都可以正常生活，所以與其互相爭奪酋長之位，倒不如大家各有各做，亦立下誓盟唔會因爲大家用嘅手段唔同而作出批評。因為大家都相信，面對同共敵人嘅時候，大家都會目標一致咁去抗敵，只係大家不過問大家嘅方式同手段姐。
因此喺一開始，即使面對住強大嘅部落G，部落K嘅成員都從不畏懼，因為佢地目標一致，有勇有謀，所以部落G對部落K嘅入侵都一直無太大進展，局勢就處於膠著狀態。直至有一日，部落G終於挖出佢地嘅禁忌武器，有「白色惡魔」之稱嘅高達，連同幾部吉姆投入戰場。喺一個冷兵器時代用高達，戰況理所當然就會完全唔同。部落K嘅魔法漸漸無法招架高達嘅高出力藍白光鐳射步槍，所以部落G以壓倒勝嘅姿態連贏幾場小規模嘅戰事。不過喺呢個時候，部落G嘅將軍表示自己唔想趕盡殺絕，所以提議部落K接受部落G提出嘅和約。具體來講就係只要部落K嘅下一任酋長容許由部落G揀出來，咁以後大家就相安無事，繼續過正常生活。
面對如此絕望嘅情況，部落K嘅成員都慢慢分成兩批人，一批就希望議和，而另一批就係主張繼續抗敵。不過，由於部落K入面大家先前建立過嘅共識就係唔會因對方嘅做法而有意見，所以都繼續各有各做。不過就喺呢個時候，兩邊嘅人馬當中就慢慢出現左一個奇怪嘅情況，就係比起以往大家自發用自己嘅辦法抗敵，漸漸變成咗好多部落成員都係會因應有消息指要出動先會出動，而呢個問題喺不接受議和嘅一方係相對明顯，例如只要有消息指出某村被吉姆攻擊果陣，大家就會蜂擁而至，因為大家都好好人，唔會見死不救。
不過有一日，有一位來自遠方嘅遊吟詩人為咗搵靈感而來到部落K，訪問部落K主張抗敵嘅成員，路人A。咁詩人好奇就問究竟部落K入面係邊個帶領大家奮勇抗敵嘅呢？路人A回答詩人果陣就話其實係無人領導㗎，只要消息一嚟到，大家就會發自內心咁出動。詩人聽到之後當然覺得感到好感動，因為佢係為部落K嘅人每位都對自己群體嘅無私奉獻而感動，但同時詩人內心亦產生左一個疑問：消息能夠令大家行動，但係究竟啲消息係從邊度嚟嘅呢？
咁當然呢個只係詩人嘅諗法，最後佢都無開口問到路人A。但呢個時候路人A見住若有所思嘅詩人，佢就再補充咗一句：「消息成日都提醒我地要相信同伴，各有各做，唔好互相批評㗎！」
結局......結局？結局就係後來有個考古學家喺墨西哥瑪雅嘅金字塔入面發現柱之男.......啊SOR應該係佢發現原來呢個故事唔係發生係古代，而係發生係幾千年後嘅未來！但呢個又係另一個故事嘅開始啦！
P.S. 以上故事內容純屬虛構，並無任何隱喻，如有雷同，實屬巧合，不過大家中意點解讀呢，本人就控制唔到喇。
（本欄逢周一、四更新。敬希讀者垂注）
-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-
HappyKongner 招稿喇！！！
我哋嚟緊會喺逢星期五加設 【Kongner投稿天地】 ，俾廣大Kongner 弟兄姊妹能夠有發表佢哋意見嘅地方，亦都可以鼓勵大家多啲運用自己嘅闡述能力。
有興趣嘅朋友歡迎直接Facebook Send Message 俾我哋，又或者Email 去 happykongner@gmail.com 同我哋傾都得。
期待收到大家嘅鴻文大作！
納稿標準：合乎邏輯，文句通順，言之成理即可，不過編輯部同事比較嚴謹，大家自己小心。
