【英國佬有畀香港民主咩？】
一，本來，今日好忙；但見到有 #Nancies 同 #Pinkies 好無知咁話：「香港人講咩民主自由；當年唔見你問英國人攞？」
二，有冇聽過「楊慕琦計劃」？話說第二次世界大戰之前，英國政府見到前殖民地，尤其係亞洲嘅殖民地，似乎都唔可以由少數洋人管治。爆發第二次世界大戰，民族主義更加興盛；二戰後既亞洲政治，基本上都係反帝脫殖。
三，用今日嘅視角去睇呢段歷史，某程度上脫殖運動係廿世紀意識形態之爭嘅延伸，亦係冷戰嘅前哨戰。反帝反殖嘅土著，一係武裝部隊，一係就紅底遊擊隊；獨立之後，呢兩班人繼續內戰。有啲好似南北韓，分成兩份。有啲就民族主義建國，有啲就軍法統治，有啲就政教合一。
四，唯一嘅例外，就係香港。但當時嘅英國，又點睇呢？1946年，當時嘅總督楊慕琦向倫敦提出，成立市議會，三分二為民選，三分一委任。留意返，當時中共都未成功奪國。
五，不過，1947年佢就離任，由葛量洪接手；葛量洪就話：「香港嘅問題係大英帝國同中國嘅關係，唔可以當係一般嘅殖民地咁看待，由民主到自治唔合適，獨立就更加唔可行。」（葛量洪回憶錄）
六，話說，葛量洪其實23歲就第一次來香港，之後試過學廣東話，後來去北京學北話。由26歲個年開始，佢做咗十年特別助理輔政司。第二次世界大戰爆發之前，佢話見自己冇得升，所以1935年申請調去百慕達，減人工六成都冇所謂。雖然冇 documented evidence，但似乎葛量洪認為香港係一個無險可守嘅地方。話說，1936年英軍駐港司令提交左一份《香港防衛計劃》，都講到明無海軍支援香港基本上係無得守。
七，楊慕琦真係黑仔；1941年上任，三個月後就做戰俘。又話說，戰前上一任總督羅富國，1940年開始話自己病咗，返英國休養喎。咁啱嘅？
八，殖民地部派葛量洪做戰後港督，多少都因為佢熟悉香港嘅情況。此外，第二次世界大戰嘅時候，葛量洪響百慕達牙買加做官，同美國合作有功，最終都升職做斐濟總統兼西太平洋高級專員，所以葛量洪都有啲國際視野，似外交官多過殖民地官。
九，以上係香港戰前戰後嘅背景。簡單總結就係，咩民主自由吖，準備打仗都搞唔掂喇；但戰後第一個 agenda，就係政制改革。
十，葛量洪固然想「睇定啲」；但都唔駛等幾耐，中共就成功奪國，英國保守黨1950年上台就同中共建交，中共就暫時話唔會收返香港。
十一，1950年代，香港有國民黨嘅人，又有共產黨嘅人，結果就係一個好 delicate 嘅平衡；話說 1957 年就已經有一次暴動，當時係國民黨支持者衝去共產黨支持者嘅地盤。根據英國嘅解密文件 FCO 40/327 周恩來有講過：「任何將香港變成自治領的行動，中國均會視之為非常不友善的舉動。中國希望現時香港的殖民地政治狀態，絲毫不變。」
十二，中共嘅華僑事務委員會主席廖承志 1960 年接見香港工會訪京團，就話如果香港走向自治，就係非常時刻，中共會毫不猶疑解放香港、九龍同新界。
十三，1960年代，最震撼嘅莫過於67暴動；當時中共自己都失控，下面班擦鞋仔當然自作主張。最後又係周恩來話，唔好搞咁多事，香港又咁樣，捱多一陣。
十四，文革結束，1977年7月，鄧小平執政。同年10月國慶，接見港澳各界。1978年4月中共就成立國務院港澳事務辦公室。1979年3月麥里浩訪京，鄧小平講到明，一定要收返香港，但點都會尊重香港特殊地位。
十五，其實由呢一刻開始，英國根本只可以「做得幾多得幾多」；1985年立法會間選，1991年立法會直選⋯⋯ the rest was history。
十六，講返以上嘅歷史，都係想補充一下大家嘅認知。Nancies 話點解香港人唔問英國人攞民主自治，實情係自從 1950 年代，中共都已經高度干預香港事務。1980年代開始，英國更加只可以「做得幾多得幾多」；8964之後，1991 年直選，之後 1995年「冇直通車立法會選舉」，都只係「做得幾多得幾多」。
十七，大家記唔記得，當年中方又鬧彭定康係千古罪人又話佢係三違反，同今時今日班 #五毛 淨係識鬧 #NMSL 一樣，都係少少 decency 都冇。就係咁，香港捱咗幾十年；1976 年 Richard Hughes 寫咗本書，話香港係 borrowed place on borrowed time。提咗你㗎喇，係你哋自己對中共有不切實際嘅幻想之嘛。
