【全場精華】童話故事，多一個都唔會嫌多！阿辛斯奧季前重傷，一直養傷到今時今日，直到今場終於有機會喺今季首度亮相。結果，佢後備入替後半分鐘就左腳第一時間掛射得手，之後仲要整多個助攻比賓斯馬 (呢球又係超級靚波)，皇馬 fans 當然係笑逐顏開啦。去到比賽尾段，南韓國腳李康仁好似同沙治奧拉莫斯有仇咁，一下兩下三下，結果球證毫不猶疑地將佢趕離場。不過，華倫西亞其實上半場嘅發揮還算可以，阿叔特別想提一提中堅古拿蒙 (Hugo Guillamón)，呢位「千禧後」其實喺2月份先首次喺西甲上陣，而喺比賽重開之後嘅兩輪賽事，佢都以正選上陣，可見領隊施拿迪斯 (Albert Celades) 對佢嘅信任 (當然華倫西亞陣中嘅其他中堅係咩情況大家心裡有數)，而計埋上場對利雲特 (阿叔都有睇)，古拿蒙喺呢兩場波嘅觀感都相當可人，冷靜、唔怯場，防守亦都好稱職，絕對值得一讚，當然時間尚早，佢未來嘅成長會係點就拭目以待，另外門將施利臣 (Jasper Cillessen) 都對得太公婆住，因為今場可以救嘅波，佢都救哂，奈何皇馬有的是質素。
