這篇買樓「禁區」，DSE 如此作答的話，有中文老師覺得可以攞咩Grade呢。
DSE又到，中文作文卷又有題目提供：「在日常生活之中，有各式各樣的禁區。試就個人的想像或思考，試以「禁區」為題，寫作文章一篇。」係我嘅，我會咁寫：
禁區，英文Restricted Area。人生，有唔同嘅禁區，上至情慾禁忌，下至泊架車，都會有「立入禁止」牌提供。不過，要數到最令人頭痛嘅禁區，一定係「住屋禁區」。
香港嘅「住屋禁區」好恐怖，恐怖在個禁區範圍會越來越大，就好似你玩騰訊（700）隻「吃雞」Game《絕地求生》咁，個安全圈會越縮越細，你上車吃到雞嘅希望，會隨時間越來越低。
一開Game，你200萬上到車，於是你努力執裝備，儲彈藥，步槍、衝鋒槍、倍鏡一路行一路執，到你整裝待發，諗住穩守突擊食雞啦…Opps！禁區擴大，自由的圈圈縮細啦。
咁你有得揀咩？冇呀！唔通喺個圈外等死咩？於是你起身，望下四圍，左邊冇人，右邊都冇，衝呀！向個白圈跑呀！
有啲人會選擇穩打穩紮，低調做長跑槍手，腳踏實地執裝備，打工儲錢，朝買樓的圈圈直跑；但就算你係小明，跑得快過火車都好，個圈只會縮得比火車更快！
有啲人就會做車手，搵架車仔上，希望快啲入返圈。炒股投資好正路呀，「騰訊唔會跌架！」「買平保包保安全啦！」然後，你1月買入，依家？坐艇扣緊血。如果爛船有三分釘嘅，咪拎個醫療包出嚟療下傷，起身後咪一條好漢繼續向個圈喪跑。唔好彩嘅，畀人Head shot，出局死開啦。
你以為你追到個圈咩，佢又縮細，你一追到原先目標個上車盤銀碼，佢又加碼，你儲到300萬樓首期，上車價變400萬；你有400萬？佢變500萬。如是者，喺追趕上車目標嘅過程上，傷嘅傷，死嘅死。好唔容易，爬過高山，避過對手，你終於成功去到喺邊界嘅最後戰場，上到車啦，還得神啦，你喺層700萬嘅樓開香檳啦！Cheers！
然後你再望下個圈，已經縮到一粒米咁細；你抬頭，望下四周，你個生活圈，已經縮剩一個200呎嘅劏房之內，從此，人生嘅禁區範圍更大，喺供樓以來嘅一切，都係禁區。追追趕趕，只係為咗走入圈，走入安全區；但到入咗圈上咗車，先發現原來只係另一個更大嘅禁區。
正當你思考人生時，有一個人喺遠處，「劈啪！」你被Head Shot了，而打你嗰個人，由頭都尾都冇跑過，一出世就喺安全圈，含住金鎖匙有父幹，注定食雞。
面對香港個「住屋禁區」，我都好想好似個想考TSA嘅小學生咁，瀟灑地講「我都想試吓博上車呀，如果唔係人生一啲難度都冇。」
by千頌C@堆填區
http://fb.com/winbigwok
400萬樓首期 在 我想買樓- 唔好以為係咁易儲到幾十萬首期，就可以上到車 ... 的必吃
唔好以為係咁易儲到幾十萬首期，就可以上到車。因為宜家香港按揭規定仍然好嚴，除咗要睇銀行肯借幾多成按揭俾你之外，仲要睇下你入息過唔過到壓力測試。 ... <看更多>