承蒙友欄 拖肥工廠 抬舉, 喺度略為回應一下 #愛華頓 今個轉會窗嘅動作對佢地盤數嘅影響。
入正題前，例牌指定動作呃 click 😏- 剛好一年前曾經寫過“愛華頓面對觸犯FFP條例風險” (https://s.fanpiece.com/vAD6zRJ), 之後亦寫過"前阿仙奴股東 誓將愛華頓打造成「曼城2.0」?" (https://s.fanpiece.com/kctTEPi)。有留意開呢個專欄嘅朋友，相信對愛華頓自從2016年易手後嘅情況已經頗為理解，至於新讀者，可以先睇吓呢兩篇文 (當然，舊讀者都可以 click 多幾次當係溫故知新)。
愛華頓一直都未打得入歐洲賽，所以暫時根本無需要遵守UEFA FFP 三年累計許可虧損不得超過€30m嘅要求, 但以佢地2018/19球季蝕過億英鎊計，就連英超版 FFP 三年累計許可虧損不得超過£105m嘅要求都好大機會爆(舊文有講，我翻炒得嚟呃 click都唔係亂呃🤣🤣🤣)。
大家或者留意到愛華頓呢三位新收購都係近呢個星期左右先落實，有評論就指出可能係同最近英超通過效法UEFA做法，決定作出 FFP評核時，將 2019/20 同 2020/21 球季合併計算有關。呢項措施原本當然係基於各地停賽/閉門作賽嚴重打擊球會收入嘅考量，但亦都為原本虧損水平近乎臨界點嘅球會，提供一個重新計劃嘅機會。
原文作者期望哈美斯能夠為愛華頓帶來豐厚嘅商業收入，我自己相信多少都會有幫助，但畢竟全球實體經濟前景仍然不明朗，加上英國疫情持續反覆，幾時可以重新俾球迷入場都係未知之數。而愛華頓始終都係無份打歐洲賽，咁嘅情況下愛華頓收入嘅上升空間必然受到限制。即使愛華頓“製造”收入方面嘅創作力量同幻想，就連曼城都可能會嚇一跳，但要填補嘅差距都真係幾大。亦都唔好唔記得，愛華頓暫時都只係低價或者免費放走部分冗員，極其量只係慳咗部分人工，但唔似車路士賣夏薩特有條大額出售球員溢利入賬。
而假設愛華頓今季生生性性打到入前六（或者贏FA Cup）, 下季有得打歐聯/歐霸，就即時要面對UEFA FFP. 呢點可以參考狼隊嘅案例 (https://bit.ly/2GWfeW2).
