https://www.facebook.com/fortunetao/posts/598646800326016:0
＃板塊淘金 ＃魏力 【淡友撤退 人幣再貶？】
港股由去年底靜靜雞反彈1,000點過後，又回復買賣兩閒、個股跌多過升的陰乾悶局。話衰又衰唔哂，每個板塊都總有一兩隻表現較亮麗，例如早前推介的零售股高鑫零售（6808），唔覺唔覺創52周新高。
以前投資者好興追落後，即係唔買升緊嗰隻，走去追隔離左右，但近月呢招明顯唔work，皆因個池唔夠大，去年日均成交得669億銀，根本不足以全個板塊一齊掃，變成升來升去都係嗰一兩隻。舉多個例，呢排手機硬件股炒極都係丘鈦（1478）、舜宇（2382），如果貪細隻掃高偉電子（1415），回報就差一大截。所以，港股成交未旺番（日均去番800至900億元）之前，順著資金去向，唔好「懶醒」追落後，勝算自然會增加。
人行上周狂挾息、挾匯殺空倉，有戰友inbox問魏力，人幣貶值潮是否告一段落？剛剛相反，魏力認為阿爺重手消滅淡友，是為新一輪貶值作好準備。 皆因人仔貶值有助谷出口、振經濟，兼遏資產泡沫，問題不是貶不貶，而是如何貶。如在淡友上足子彈、成手空倉時貶落去，必會形成滾雪球效應，一貶不可收拾。如今淡友大撤退後，個場重新由阿爺完全掌控，貶值就會較有秩序，加上美元加息周期才剛開始，人幣未來一兩年貶值壓力仍不輕。 執筆時離岸人幣又跌300多個點子，會否是新一跌浪的開始？
