邪惡在樓上（上）
朋友都以為，我有一個美滿嘅家庭。
我有份好工，有個收入豐厚嘅老公，有兩個仔，大概就係一個平凡女人可以得到嘅，最大嘅幸福。
但係，當我老公狠狠地毆打兩個仔嗰陣，我都懷疑過，我到底幸唔幸福。
直到有一次，我意外地發現，我最好嘅朋友，一個經常炫耀老公有幾錫佢嘅女人，身上有住無數新舊交錯嘅傷痕。
「你老公打你？」我義憤填膺。
佢冇哭訴、冇憤怒，佢嘅即時反應，係苦苦哀求我……唔好話畀其他人知。
嗰一刻，我意識到「幸福」嘅真正含義：努力隱藏生活中嘅不如意，對外展現最光輝嘅一面，得到其他人嘅艷羨同認可。
我係一個平凡嘅女人，我素來遵守規則，
正如當年大家話「女人幾多歲就要結婚」、「結咗婚就要生仔」、「生一個仔都唔夠」……我全部都遵守晒，先獲得現時嘅「美滿生活」。
所以，我冇將老公打仔嘅事講出去。
值得慶幸嘅係，我兩個仔好乖，成績唔錯，親戚朋友都好羨慕。
但係，最近我面臨一個新問題，我個細仔阿治，學壞咗。
阿治認咗兩個「大佬」，都係望落似流氓嘅少年。
阿治成日帶佢哋返屋企玩，我勸過阿治唔好同佢哋來往，
但阿治反問：「你冇發現咩？自從我認咗大佬，阿爸就冇打過我哋兩兄弟。」
我無言以對，事情的確係咁，兩個仔讀中學後，老公間中仲會對佢哋拳打腳踢。
但阿治嘅「大佬」出現後，老公敏銳地發現，呢班流氓唔好惹，就冇再打過仔。
為免自己嘅權威被挑戰，老公開始對兩個仔犯嘅錯誤充耳不聞，甚至故意避開阿治，將佢間房搬去二樓。
我一直以嚟嘅期望，咪就係「兩個仔唔再被老公打」囉？我應該滿意至啱。
所以我冇再出聲，直到阿治帶番嚟嘅人愈嚟愈多，愈嚟愈雜，我忍唔住鬧咗佢幾句。
結果，阿治毫不猶豫咁衝上嚟，窩咗我幾拳。
「打得贏嗰個話事，呢個係家規，阿爸教嘅。」阿治笑容輕蔑。
一班流氓喺旁邊指指點點，我羞恥到想搵個洞鑽落去，我身為阿媽，點可以俾個仔打？
我捂住塊臉，落荒而逃。
好彩，佢哋雖然係流氓，但佢哋唔八卦，我被阿治打嘅事，冇傳出去。
自此之後，我更努力避免同阿治發生衝突。
或者，我真係冇能力教好阿治，但至少我仲有一個乖巧勤奮嘅大仔。
等阿治十八歲，搬出去，我嘅任務就完成咗。
直到有一晚，阿治佢哋帶咗個女仔返屋企。
當然冇同我打招呼，我只係見到佢哋匆匆忙忙上二樓嘅背影。
阿治拍拖，帶咗女朋友返屋企？
之後嗰幾日，阿治都叫我煮多份飯菜，佢拎上去畀個女仔食。
阿治仲會帶陌生嘅後生仔上去，樓上偶爾傳來一啲奇怪嘅聲音，睇嚟佢哋唔係拍拖，係……唉，我都係唔好理咁多。
幾日後，我上二樓打掃，見到嗰個女仔。
佢坐喺間房度，形容狼狽，一見到我就雙眼發光：「阿姨，救我！」
喺佢細細聲嘅叙述中，我知道佢叫小順，今年十七歲，係俾阿治一班流氓捉番嚟禁錮。
小順話：「佢哋強姦我，打我。」
我掃一眼佢手臂上嘅淤青，都唔係傷得好重啫，阿治平時打我，都唔止呢種傷勢。
房門外，阿治同幾個流氓打緊牌，我都幫唔到小順。
我只可以同小順講：「咁你快啲返屋企。」
我諗，阿治佢哋玩夠，就會放走小順。
一個星期後，我再上二樓，小順仲喺度。
阿治突然出現，嬉皮笑臉咁講：「小順係我女朋友，佢想喺呢個城市搵工，所以嚟呢度暫住。」
阿治望向小順：「我講得啱唔啱？」
小順用力點頭，眼神有幾分麻木，幾分惶恐。
我知道阿治講緊大話，但我有咩辦法呢？
我只可以講：「快啲叫佢返屋企啦。」
下集：https://bit.ly/2BRKLpn
將專頁設定為「搶先看」/ "See first"，最新故仔馬上睇！
穿越做白雪公主個阿媽：https://goo.gl/QyZJpw
我被我綁架：http://bit.do/e2qYk
#短故 #短篇 #小說 #陳美濤 #廣東話 #粵語 #tomatochan #邪惡在樓上
