【《Possessor》：年度最佳海報之一，屌，最好睇都係張海報】
上畫時有睇過段預告，有感係好型但唔知做乜嘅題材，最後都冇留意，點知呢張海報幾乎係個個電影網站，都選為2020年度最佳電影海報設計之一，搵吓資料，好似幾得意咁，點知就中伏。
故事講女主角係一個高科技殺手，透過連接到陌生人嘅身體，經由大腦去控制對方執行刺殺任務，令件事變成一場陌生人隨機殺人事件，暗殺行動神不知鬼不覺。女主角執行一宗新任務果時，陌生男身體醒覺咗，令女主角意識困咗喺佢身體入面，開始分不清真假，而陌生男都要同「自己」腦交戰。意念幾前衛，雖然感覺有少少似《22世紀殺人網絡》，但完全唔係果回事。
導演Brandon Cronenberg係David Cronenberg個仔，講真David Cronenberg已經麻麻地佢啲戲，點知佢個仔仲難頂。成套戲空有意念同視覺效果，一味得個「意識流」。劇情極度空洞、故事雜亂無章、得幾個角色都搞到好混亂。有個咁前衛嘅理念，連自己都解釋不清，人物關係、劇情扭轉全部平平無奇，唔係想花生到底點收科，又間中有啲色情暴力場面吊下癮，應該悶到中間會熄機。係呀，有個咁嘅故事，你以為會緊張刺激，又或者係套科幻恐怖片？Sorry，係冇嘅，大部份時間只係喋喋不休對白、女主角懷疑人生嘅情節－－都睇到你懷疑人生。結局係出人意表，拍得好堅會大吃一驚，但有個咁「爆」idea竟拍到平平無奇，你都算好嘢。
一單還一單，《Possessor》視覺效果堅係正嘅。由女主角變成男主角個「蠟像複製人」，到男女主角開始懷疑人生，腦交戰嘅幻象、皮膚開始變鬆、突然嘅爆頭式人皮面具，唔多似有CG，一鏡直落真係唔知點拍出嚟。大量嘅爆頭、割頸、噴血、正面全裸鏡頭，相信香港上正場都係「三級都要CUT」果隻。即使描述都市空虛、懷疑人生景象－－係，成套戲唔止你，班主角都懷疑人生，個鏡頭都扭到好似《潛行凶間》咁，呢一切視覺效果堅係大開眼界嘅。
但，只係流於「撚鏡頭」囉。
講真，《Possessor》唔可以話佢差，單係個視覺效果同意念堅係正嘅，但有個咁正念頭execute唔到，再正都係枉然，尤其是呢類植入思想、開始分唔清人生係真係假故事，已經成行成市，你仲係流於「撚鏡頭」之流，又點會掂丫？
Andrea Riseborough曾經都叫做沾染過荷里活大片，搞搞吓愈拍愈小眾、愈拍愈Creepy，好歹都係個演技唔錯嘅演員，拍埋咁多怪雞奇片，真係返唔到轉頭喇。
‼️第7屆晞。觀影記事讀者電影投選現已接受提名，請躍躍參加啦：http://bit.ly/38HwhoQ
📣即訂Patreon加強版，閱讀更多精選深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy
或使用Payme link：https://payme.hsbc/jackyhei
或透過Paypal捐款：paypal.me/jackyhei
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
【IG請follow】www.instagram.com/travelerwithmovie
