#是日好讀 生活的反思
【懺悔】
text / 彼
望到個入閘機爛了，我反應不是很大。我知道有好多人覺得好過份，有啲人覺得爛極都無個制度咁爛。就同立法會個噴黑咗的國徽一樣，唔做出嚟，你係唔知道 the city is really dying。
只係我一直晌度諗 what if 的問題。罷搭港鐵，力度唔低，有好多朋友因為堅持唔畀港鐵賺錢，所以寧願走更遠、畀更多。但城市的系統被政治性歸邊係大勢所趨，你與我可以點反應？
最簡單，今日唔搭港鐵搭巴士，what if 巴士都載咗你去差佬路障？如果連巴士都唔搭，你可以搭乜？你一日係資本社會中被運輸的貨物，一日都只能夠徘徊晌屎味朱古力同朱古力味的屎之間，所有嘢都無的時候，我們怎表態？
我最近都無再食吉野家。但其實老麥都係中資。美心集團呢酒樓呢超市呢。759都算本土，其實都用Wechat Pay。小店嗎？我家附近幾乎沒有。
再說不要出街吃了，買餸煮來吃吧。我家的街市係領展，然後領展又賣畀建華。入面啲店舖，連肉枱都係連鎖，新鮮食材都係集團式生產。你衣食住行，基本上都毫不自主。唔搭港鐵巴士同唔食豬牛肉毒菜，你會發現生活幾乎陷入極大窘境。呢個就係城市人的悲歌。食好住好，就係變成咗無法自主自立的無腳雀仔。
一場反送中，你會發現我哋是多麼無助，權貴之人係幾咁招積。你總係無法獨善其身。如果表態已經無從選擇，我哋真係要承認自己係柒的，係資本主義下的奴隸。我們已經完全喪失了自主的能力，返工放工都老年咁遠，不靠交通工具是完全沒有辦法生活。工作每星期以數十小時計，講自主？完全無 ground。你唔依賴利益集團都係無辦法生存，當利益集團都歸黨所有，所以唔係黨，你的確係好難生存。
我有這樣的感覺：今日我們精神狀態頹靡，其實也是感覺自己無落腳之地之故。什麼都是靠人，雙腳就離地，被人揸頸就命。生活場景每個環節相扣，我們開始覺得不貼地的生活毫無意義，連食豬餿都要存感恩的心謝飯。政治理念生死相逼，因為牽一髮動全身。我的身家性命財產命懸一線，而我，每日出post支持民主，而又唔敢動個真格。
諗到最盡，其實只有大自然先會畀你唔需要靠權勢都可以自主生存。初級生產者真係好卑微但係又好強大。睇天做人，自食其力，願意彎腰低頭向大自然討食，努力唔畀自己餓死，就係一種尊嚴。一定要支持一個初級生產者的生存，因為他們在我們未有能力自己也成為生產者以前，可能係最重要的生活重心。其次，需要重建不建基於利益權力關係的interpersonal network，有餘要分享，有難要同當。當資本主義同極權合謀，切斷我們的鄰舍關係，外判我們的生活需要，我們要再建立，係好困難，好多不信任同隔閡，但可能唔係無辦法。呢個是否區議員可以做更多協作的事呢？教會是否可以對外做更多一點呢？
我其實什麼好東西也沒有想到。只知道，面對一部打爛咗的入閘機，我們其實要面對一種新的生活想像。這篇不是論政大智慧，是自己的生活懺悔。
照片來自whaptsapp羣組
－－－－－－－－－－－－－－－－－
| 支持 Breakazine 深度探索香港議題 |
一年HK$152訂閱 ➤ http://bit.ly/2Y59vov
每月HK$150支持製作 ➤ http://bit.ly/2x1mHuC
Breakazine網店3本以上免郵 ➤ http://bit.ly/2Gtj7hY
電子書＠讀冊 ➤ http://bit.ly/2kcuHpW
Follow Instagram ➤ http://bit.ly/2kExxEn
