關於 媽媽的神奇小子 配樂 ，我們在網路上蒐集到這些相關的討論、資訊與評價

《#媽媽的神奇小子》係好睇，前半段。快速、有效去講蘇樺偉點解與眾不同，做阿媽嘅吳君如帶埋佢返工受盡歧視，去到某個位壓力爆煲想一鑊熟，壓力同情感都好強。然後交代更多家庭角色，參加訓練，拎到第一個金牌。用咁短時間令人入戲，唔簡單。三個不同時期嘅蘇樺偉選角一流，樣似又演得好，吳君如亦出心出力去做好角色。加上配樂大放異彩，激昂帶動氣氛，苦慘還是鼓舞都易令人起晒雞皮、喊到停唔到。仲有最需要讚美術，舊屋邨個景好靚，屋企門口擺檔、走廊擺好多雜物、中秋節點燈樓下一齊食飯，二三十年前香港先有嘅畫面，俾著依家扣分扣到無屋住。
.
一直講頭半嘅好，即係後面嗰半係出咗啲問題。就係前面太順，太激動人心，中間開始無力繼續、跌Watt，莫講話更上一層樓。自從陸永出現，就改變一切。我明，想講運動員生涯短，為未來打算，中間有矛盾掙扎。拍係有拍出來，但人設取態前後出入，靠加強兩母子衝突營造戲劇性。生性孝順嘅主角本來見屋企為佢家嘈屋閉所以舉手放棄跑步去做速遞搵錢，但後來劇情需要就講阿媽迫拍廣告阻住佢跑步鬧晒交，我係諗唔通。唔知有幾成真，會唔會喺前因後果連接方面做得未夠好。
.
心地善良正能量，有教育意義，有明星有新演員，落足資源去拍。香港出產唔同題材唔同規模電影作品係好事，我真係很想大力撐呢套戲。前面太好，顯得後面嘅問題較明顯，直接講出嚟的確有啲唔好意思，希望劇組、片方明白。其實我都覺得整體係可觀，幾肯定套戲會得到主流讚賞，而社會亦很需要呢部作品。
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你起頭！
天下一電影 One Cool Film
媽媽的神奇小子 Zero To Hero

講兩句《媽媽的神奇小子》（微劇透）
-
尋日公映，
開畫日中午票房已經超過100萬。
-
乘住奧運之後、暑假同消費券效應，再加埋人畜無害嘅勵志題材、滿滿嘅正能量同埋頗強勁嘅宣傳，收得係預期中事，1000萬應該無咩難度，我估計2000萬都有機會。
-
套戲係一碗足料嘅雞湯，用料靚，而且適時進補，應該可以滿足大部分觀眾入場前嘅期望。電影演員嘅表現尤其出色，少年同成年蘇樺偉嘅演出真係好好，舉手投足都難以想像佢哋只係演員 ，兩個演員飾演同一個角色，但可以喺講說話方式、動作同神態上做到咁同步，唔係幸運，而係刻苦練習嘅成果，亦係《神奇小子》最大最大值得一睇嘅地方。
-
而電影亦敢於對政府批判，帶出獎牌背後原來運動員嘅生計受唔到保障，做速遞嘅人工原來好過做殘奧金牌，「同工同酬」嘅吶喊應該延伸香港市民對運動員待遇嘅關注，亦係喺而家言論自由不斷收緊之下，相比「安全」嘅「意見」，可以作為觀眾情感投射之一。
-
讚咗好多，但其實我睇完《神奇小子》，係明確地自己唔鍾意。好似上面所講，電影係一碗雞湯，有營養，overall嚟講亦好味，但對我嚟講就係太濃，太多味精。最值得鬧嘅，就係配樂，電影入面適當嘅音樂點綴當然可以畫龍點睛，但電影大部分嘅時候都係一輪接一輪節奏強勁或者煽情嘅配樂，電影有幾幕戲拍得幾好，但礙於配樂，真係專心唔到，可惜。
-
除咗配樂，可能又係礙於target嘅觀眾群，對電影唔夠自信嘅關係，一啲寫得好嘅情節或者對白，因為三番四次重覆，都會令觀眾由欣賞變得煩厭。其中「望阿媽」食‘‘on your mark’’嘅呢一句，食字食得極好，蘇樺偉弱於起步，唯有媽媽先係佢係迷途中嘅舵，無論係練習定係去到奧運，跑嘅目標都係為媽媽，將名利榮辱拋諸腦後，令人感動。但就係電影之後三番四次重覆呢句金句，亦無層次上嘅昇華，令優點變成缺點。
-
總括嚟講，雖然我唔鍾意（事實上，好多我鍾意嘅戲反而大家會狂鬧），但唔代表套戲一無是處。平心而論《媽媽的神奇小子》仍然係一套有唔少明顯優點嘅作品，票房評價應該都會唔錯，如果最後真係收得，對下半年嘅香港電影算係一枝強心針。

【#狂迷投稿】▒ 文：Little Froggy ▒
// 碎濕濕的香港電影隨想 //
.
個人喜好為《手捲煙》>《濁水漂流》>《殺出個黃昏》
.
《#手捲煙》的拍攝手法，美指，演員，配樂都互相配合，不覺得有邊樣係喧賓奪主，睇緊嗰陣我覺得我開始學習如何觀賞一套電影，很多影像的比喻和處理都是事後孔明。
成套戲最好係陳健朗導演，佢做幕後留鬍又
滄桑污搲既形象唔知點解我覺得好吸引🤣
最終揭終嗰下真係好唏噓，兩邊不是人的矛盾就覺得關超一開頭做咩要捱義氣幫到底。
成套戲其實可以講多少少女人的部分，唔係睇片尾Credit我都唔知Ran爺有份演出，佢既鏡頭快到我都睇唔切😅另外一讚主題曲，好有江湖感覺，旋律同主唱把聲好夾，有機會角逐最佳原創歌曲嗎?
.
《#濁水漂流》其實個故事取材好寫實，咁岩之後有睇某記者針對深水埗無家者被食環趕走的特寫新聞，更加睇得出輝哥點解要咁堅持政府道歉；但無奈喺現實生活中，我明其他人攞2000蚊妥協的地方。成套戲我覺得敗筆的地方在於社工何姑娘，蔡思韵一拍埋去老戲骨到的戲份就令我出戲，社工人選難道沒有更好的選擇嗎?反之，柯煒林同朱康的演出令我驚喜，尤其是柯Will，新生代中其中一位我很喜歡的男演員，佢自評自己係being喺木仔個角色入面，作為觀眾的我，睇得出佢已經同角色混為一體。悲傷的結局，真實的冷酷，人們照舊生活，天橋底下甚麼也不是。
.
《#殺出個黃昏》
可能是我戲齢問題，睇到謝賢同馮寶寶carry全戲都無太大感覺；同埋，最大問題係，我覺得成套戲好似碎上咁，呢度講少少，下一秒鏡頭一轉去左第二個景，無咩前文後理，剪接部分唔係太識欣賞。可能自己對於年老都要做殺手呢個topic真係麻麻地，所以我投入唔到。鍾雪同謝賢的連接其實一開始好odd，兩個其實演出已經好盡力，但始終中間有個好大的generation gap，我睇到好唔自在。啲歌同配樂我都係投入唔到，最驚喜的反而係結尾credit見到林耀聲同何雁詩飾演謝賢和馮寶寶的年青版，一開場嗰下好charm。可能我都係睇返啲後生仔後生女戲感覺會好啲
.
上半年有看的港產片質素還不錯，期待下半年《女人街·再見了》和《媽媽的神奇小子》。
.
加油，香港電影
.
×☝🏽☝️☝🏼多謝投稿！有嘢想講，都歡迎各位投稿分享你嘅睇法～×
.
加入狂友fb群組【 #狂氏電影綜合症候群 】
*// http://bit.ly/32xJWLp //
直接交流 × 傾講電影有你起頭！
.
*追蹤instagram【 madman.movie 】有你著數！
*// https://www.instagram.com/madman.movie/ //
*
*緊貼【 電影狂人-影評情報交流平台 】獲得最新電影資訊！***
－－－－－－－－－－－－－－－－－－
░電影資訊 ░獨家影評 ░幕後製作 ░戲院優惠
Fb專頁【 電影狂人-影評情報交流平台 】