喺外國食飯，貼士只有兩種：一係俾額外10%，一係就索性唔好俾。你俾得少嘅話，有啲侍應會在你面前反轉張單，啲錢叮叮噹噹咁跌晒落檯面，件事尷尬到一個點，呢個係真人真事，我見過，我真係見過。
串？串得過你認為人地只係值幾蚊多啲？我想講歐洲已經好好，如果係美國，侍應靠貼士開飯，你俾得少佢真係同你死過。所以大家要明白真係各處鄉村各處例。
當然，總會有人話「俾多幾蚊你都仲嫌三嫌四」，喂，大佬，林鄭俾乞兒都五百啦，幾蚊喺今時今日的香港，其實真係微不足道。此外，係咪俾多左就會開心左？你不如試下新年封利是封夠101蚊？睇下邊個最開心？又或者年底老闆象徵式加100蚊人工？我覺得比唔加感覺上更加令人不能接受。
人就係咁有趣，明明係多左錢，反而會感到不愉快，講真，大家出黎做野，佛爭一柱香、人爭一口氣，有時候一啖氣是千金難買的。我就算當你係施捨，你應該要讀一篇叫《課不能停》的短文，裡面有一句：因為施捨的最高原則，是保持受施者的尊嚴。不要以為有食唔食、罪大惡極，真的有人不受嗟來之食。
乞客文中說得很好的一段是：如果真的很滿意侍應，不如索性寫張feedback form對侍應的作用和鼓舞更大。是的，婊揚好人好事，是人妻先生的特殊技能，但表揚好人好事嘛，大家都能輕易做到的。
#我返到香港啦
#短短兩個鐘已經見到好多野想婊揚
#點算好
#嘩啲空氣質素
#仲有一堆充滿汗味嘅麻甩佬
#係愛呀_你
#政府派乜鬼錢
#派左止汗劑先講啦
《感觸千字文》 其實我真心覺得幾蚊幾毫不算是貼士。
早排大家都知我發咗個帖，原意只係同大家開心分享，探討下咩因由一位客人要畀出4蚊但又唔係Round up更加唔係寫錯。我一直都認為客人唔會專登咁畀。結果個Post引來其他人講成畀貼士都嫌少，香港侍應1蚊都唔值等等。初初我都有一一回應，講返我只係想知有乜因由要畀咁零丁，皆因位客人絕非乞客，成餐飯明顯開心。長篇討論一番之後，我打算完結。雖則有討論當然係好事，但惡性討論真係非常之傷腦筋，加上我只係一個人回應三百個留言。
直到第二日，我同兩位朋友到中環一間餐廳食飯，見到一位年輕侍應生笑容滿面，即使朋友無問過人就搞亂放門口的訂枱簿都繼續有禮招呼，我們並非富貴客人洗費單頭低，佢都仍然全程笑容滿面，服務真心一百分。我在結帳時就掩手畀位侍應哥哥20蚊，雖然唔多但我覺得一定要畀作為表達我嘅感激同欣賞。點知，身旁兩位非餐飲業朋友仔，都主動畀出 20蚊，作為貼士。我打從心底裡多謝兩位，因為我覺得遇上好服務一定要表現出感激同欣賞，如果有能力之下，當然要畀貼士。
離開餐廳後，到酒吧上班，直到回家，沖涼⋯⋯直到3、4凌晨時分。我個心都一直感到非常唔舒服，一直不斷喺度輪迴諗緊之前大家討論有關貼士個Post。其實香港人係咪真心覺得幾蚊幾毫係貼士？如果好服務，係咪覺得幾蚊幾毫足以代表一份心意同獎勵？如果今日位侍應生，收到我 1、2蚊作為貼士，佢往後嘅日子仲會唔會覺得服務好係必需？
大家唔好誤會我，覺得我話個侍應係因為有貼士收先落力提供優質服務。我係講緊收到一份『合理』貼士而帶出嘅嗰一份被人欣賞嘅滿足感，嗰一份被人尊重嘅感受。而呢一份獎勵唔會係1毫子，1蚊雞，或者係一個5蚊雞可以代表到。你既然畀得起幾百蚊一千食一餐飯，點解會對你認為值得打賞嘅侍應畀幾蚊幾毫當貼士？我寧願你收返一個幾毫，換你一句窩心嘅『繼續加油！』『你Service好好！』『多謝晒你麻煩晒你！』。就好似你好勤力日日死捱死OT幫老闆辛苦咗成年，但係年尾老闆畀100蚊花紅你，其實我會寧願老闆你不如同我講句共渡時艱算數。再者，乞衣你都唔會畀1個幾毫啦。
-貼士畀得衰的話，可能會變成一份羞辱
你或者可能會講：『下！畀錢你都咁多聲氣？仲喺度嫌少？』其實而家並唔係度嫌棄緊你畀嗰一蚊幾毫嘅有幾少同無用，而係講緊一份誠意。你或者會講誠意可以用錢嚟衡量嘅咩！係～要表達誠意，亦唔只係畀錢，表現到尊重同感激亦係另類答謝嘅誠意。之不過，如果你選擇畀貼士，即使貼士只係一份心意，但畀得衰的話其實可能變成一份羞辱，仲會令位自問做得好嘅侍應質疑自己。
我明白有客人絕對唔係有心，亦都唔知幾毫幾蚊貼士可能會令侍應難受，亦有心答謝。而我亦唔係宣揚人人都需要去餐廳喪畀貼士或者份貼士要超級大份。大家都知道喺香港畀貼士唔係Must，普遍已經有10%基本服務，你可以選擇唔畀。我只係想大家明白當你遇上『值得』嘅侍應，而又想用『貼士』去答謝服務嘅時候，幾蚊幾毫應該會係你唔想袋／純粹Round up，並唔代表一份打賞，更唔係恩賜。
-答謝一定要畀額外貼士？
有人可能問：『其實我咪畀左10%囉！點解仲需要再畀？』Google講嘅定義：『 貼士／小費，指給予服務生消費額以外的賞錢，以作表揚個人之用。』而大部份或者所有香港餐廳10%都係公司袋，所以如果遇到稱心服務，你當然可以『選擇』給予『合理』貼士去表揚位侍應。或者到最尾，位侍應可能仲同講：『唔洗啦！我無份袋㗎！』但你呢一個答謝嘅舉動，佢依然會勁多謝感激你睇得出佢嘅努力，佢會為你而繼續做好呢份工，會為你今日嘅欣賞而繼續Keep住做良好服務嘅熱情。如果你真係無能力可以畀到一份『合理』嘅貼士，不如考慮一份更貴重嘅打賞：寫意見書/Review。又或者，好似啱啱咁講，如果你都係覺得無咁嘅需要再額外畀貼士或者寫意見書等等，你咪講多幾句『唔該』『麻煩晒』 『你Service真係好好 』， 已經非常足夠。
-人人話香港餐飲服務差，但是否覺得好服務是應份？
人人都話香港地嘅侍應服務差，態度惡劣直頭連嗰10%都唔想畀⋯⋯唔講10%位侍應從來都無份袋，我亦唔講咩餐飲現時度度人手唔夠Training唔夠咩等等。但係如果你真係遇到服務稱心嘅侍應你自己又做咗乜？當你嫌棄香港地服務人員態度差，你自己係咪 100%係一位好顧客？你有無尊重過服務你嗰個人？咁當然又有人講，你做得呢行，個客畀屎你都要笑住食㗎啦！理得你有無貼士收，你都應份對客好，提供良好服務㗎喎！咁其實份份工你都應份要做得好㗎，老闆要你一個人睇晒10個部門嘅嘢，就算你做唔嚟你都要笑住唔呻嚟做㗎，你應份幫老闆㗎嘛。唔好講工呀，講做人呢？孔生都有講過，人之異於禽獸者，在其有仁義禮智。咁係咪而家人人都有基本禮貌有道義先？如果人人都做到，咁點解你同我生活中都有咁多殺人犯、強姦犯、自私自利嘅仆街存在？如果人人應份地有仁義道德，照道理個世界應該好美好。
-無論做人幾積極，無人賞識都會灰心氣餒。
其實喺香港仲有好多對餐飲有熱情，提供良好服務嘅清泉喺度捱緊，日日問自己點解要咁上心，日日都唔夠人，仲要做足Service，可能到頭來都係換來一個 1蚊幾毫嘅無意義貼士，或者一句唔該都無嘅回應，更衰畀人無理投訴。或者大家都覺得外國Service比香港好好多，但其實好多國家餐飲界都係只有低微底薪，靠份貼士當半糧。以美國為例，其實客人需要至少畀多消費額及州稅以外 15%-18%作為基本貼士，枱都固然無香港翻得咁癲，亦唔需要一個打十個。反觀香港侍應，大多短工炒散，即使係長工，貼士多數都係大圍除開，而香港客人又慣性唔畀。咁既然我做又36唔做又36，咁點解我仲要喺一個已經已被定型『服務低劣』嘅行業，辛辛苦苦地做清泉、做另類？
咁當然我都相信總有一班積極達人，即使無人賞識、無人答謝都繼續做好自己。但呢個世界有更多嘅人係會感到灰心同氣餒。加上，作為一個侍應，我更加明白客人對同事或者自己有幾大影響力，小至一句『唔該晒』，大至一封『表揚信』都足夠令我哋開心一整日，而呢啲小舉動就係我哋繼續保持良好服務嘅動力。
最後，其實香港地話大唔大話細唔細，如果你自問喺香港地住咗 20年以上連一間餐廳都無Meet到你嘅Standard，無一間餐廳畀過你稱心Service，其實有無諗過可能係你問題？不如開返間自己玩，你就會睇到自己所謂嘅Standard有幾高。你亦都會明白，當你做得幾好都只係收到客人指明道姓恩賜畀你嘅幾蚊幾毫貼士，仲要搞部垃圾卡機拎翻出嚟埋腳嘅感受。
____________________________________
後話：
我平時寫得多搞笑粗口諷刺文，要我認認真真寫篇千字文真係唔習慣。我要多謝中環位侍應哥哥，係你令我有啟發。作為一個講餐飲業辛酸嘢嘅Page，我覺得自己有責任出返一分力，糾正返一啲觀念。我希望有一日大家收到表揚信多過投訴信，無論客人同侍應都互相尊重，香港再唔係西客集中地，大家出街食飯都唔需要再受氣。
如果你認同呢篇文章，歡迎你Like &Share。如果你睇完覺得離晒大譜非常憤怒要投訴，我只可以同你講一聲，呢篇文係我個人睇法同立場，你亦毋須動怒。如果有朋友需要重新發表自己以前、今生、後世仍然會Keep住一蚊貼士都唔會畀，覺得香港侍應唔值嘅呢個決定，你要知道成篇文都同意你覺得唔值可以唔畀，所以你亦毋須再次發表。如果有朋友想留言分享自己去餐廳見到仆街侍應嘅經歷，我亦歡迎你請移玉步到OpenRice。如果你睇完接近 2000字嘅文章，都仍然覺得我係講緊嫌棄貼士少，我都無辦法，希望你睇多幾本書。多謝閱覽。
