-2020-
有別於過往幾年通常係一年嘅最後一日回顧下自己過往一年做咗啲咩、得到啲咩，去年12月31日我選擇沉默。
因為過去一年無論自己甚至成個香港我都覺得係「冇乜特別嘢可以寫到」，我被好幾個由細玩到大的警察朋友Unfriend了，因為政治立場被好多客戶或者讀者割蓆。
當然仲有好多其他令到自己唔開心嘅事，總括嚟講，2019過得麻麻地。
有一位情同兄弟的好朋友過去幾個月一直走唔出陰霾，佢覺得佢間接害死了一個人，因為做出了一個錯誤嘅決定令到對方自殺。佢覺得自己好衰，害死人；有另外一位朋友，因為過往幾個月嘅社會問題，投資失利輸咗好多好多好多錢要申請破產。亦有好多好多我識得嘅朋友或者讀者被解僱，突然間失去經濟能力，供養唔到屋企同埋家人，新年都過得好徬徨，年關難過。
我認識一個人，佢係我嘅偶像，我見證住佢過去10年人生好似坐過山車咁樣，經歷無數生離死別及光怪陸離嘅事。如果要自殺佢可以死十幾次，但係佢同自己講一日未死，一日都有希望；每件事發生都有佢嘅原因同埋會引導你去到下一件事嘅發展。得到佢嘅同意簡單啲同大家分享下佢呢10年係點樣坐過山車：因為爸爸欠債拋棄咗屋企人返咗大陸避風頭，佢被迫放棄海外移民嘅機會返香港照顧家人幫手還債。債務問題，經歷賣樓買樓再賣樓搬咗幾次屋。中間呢幾年一直唔知道爸爸住喺邊度同埋做緊乜，開始頭幾年只會一年見一次面去深圳食餐飯，每次提到屋企嘅困難，爸爸都會用一副「我已經留低咗層樓同埋一啲錢俾你哋，你哋應該好好運用，唔好再嚟煩我」嘅口吻去藉辭帶過，佢本身有10幾隻勞力士，仲有少少儲蓄，幾乎係每次食飯都會被爸爸要求帶一隻返去，慢慢自己只帶一隻膠錶，到最近幾年，已經沒有一年一次食飯的機會，只有每一年過年過節或者生日之前幾日的一段電話SMS：「囝囝，過幾天就生日了，祝你生日快樂，身體健康。」我想佢其實最近10年嘅生日願望都係希望可以一家人齊齊整整係屋企食餐飯。最近10年，佢有三位朋友自殺，五位朋友癌症走咗；求過兩次婚，但係兩位未婚妻都係因為佢嘅經濟問題最後偷食，取消了婚約；事業方面，係最需要錢嘅時候，因為仆街老闆或者辦公室鬥爭短短一年之內換了三間公司，份履歷表花晒。
佢可以有成百個理由去逃避或者去放棄，但係佢冇咁樣做，我問佢點解，佢答：「人一日未死，一日都仲未輸，都會有希望。人生好多選擇，好多人做錯選擇，人唔應該比過去嘅、負面嘅嘢去控制依家嘅自己。我都想日日喺屋企打機，出去溝女，周圍買嘢去旅行，但係現實話俾我知我要有承擔有責任去照顧屋企人。每件事發生都有佢嘅原因同埋令到你成長，好似打機咁樣，一條線一條線去延伸去下一條線。你永遠唔知道你今日嘅決定會點樣造就將來嘅你，與其日日喺屋企自怨自艾攬住個枕頭喊，覺得自己事業愛情朋友親情都對自己唔住，倒不如提起精神，笑住咁樣去令到自己生活好啲開心啲。」
“Optimism is the faith that leads to achievement. Nothing can be done without hope and confidence.” - Helen Keller
共勉之。
舊年我都過得唔係咁好，但係我都想努力啲去行自己人生。我年頭創業成立了自己嘅獵頭公司。講真創業初期生意真係麻麻，冇錢整網站、冇錢請人、冇錢做宣傳，啲熟客知道你去開獵頭公司嘅時候，心入面好想幫手但係公司政策係唔可以隨便去放俾一啲蚊型公司。頭幾個月嘅現金流比較差，因為遇見一啲閪客：私底下同求職者傾好晒，諗住背住我搞掂晒成個過程慳返Recruitment fee；拖數拖足三個月，幾萬都要分期付款，仲要係大公司；18萬嘅單一路唔肯找錢，出律師信都唔肯找，（其實係我錯）因為我當初點樣迫佢哋都唔肯簽T&C，最後張Invoice變到60,000先肯找數，依個客係一間上市公司。當然仲有因為政治問題嘅甩單或者不選擇黃色嘅求職者等問題。但係慢慢慢慢咬緊牙關一步一步咁樣向前行終於算係捱過咗呢段困境。愛情方面同女神分咗手，有個前輩同我講「唔啱嘅鎖同鎖匙，係永遠都係開唔到個鎖」响我事業同愛情嘅低潮嘅時候我身邊出現咗一個人，佢比我嘅感覺係咁大個仔都未試過一種咁嘅感覺，真係想佢變做我嘅家人可以好好照顧佢，所以我決定今年同佢結婚。
今年有好多計劃，希望自己的獵頭公司可以搬去一個比較大啲嘅辦公室同埋可以請到人。Career Coaching方面，希望可以普及化做到開班教學。但同時希望可以同自己本業獵頭公司做五五比，正如一間律師樓始終都要接Case並唔係只會做法律諮詢。全職獵人呢個page，承蒙大家厚愛，會繼續經營寫多啲文章希望書展可以出第三本書，而我第二本工具書，已經賣剩250本，所以決定加印。（真係要俾個叻叻自己， 2000本書半年之內唔擺任何書店已經去咗九成，亦都要比叻叻支持我嘅人多謝你哋嘅支持本書先可以加印）
2020年，我會一路努力工作，希望我身邊嘅人、支持我嘅讀者同埋我愛嘅人可以得到幸福同埋希望。同時間我都會做好多善事去幫助一啲有需要嘅人、去幫助呢個社會，最重要我都會做返我自己。
永遠要感恩，記得你唔係最差嗰個，風雨過後一定會有彩虹，谷底都會翻身。好好愛惜自己同身邊嘅人，永遠保持正能量，世界好多人比你慘，唔好放棄自己！
大家一齊加油。
勞力士彩虹 在 勞力士迪通拿彩虹圈 開箱來了！原鑲好香 #rolex ... - YouTube 的必吃
勞力士 迪通拿 彩虹 圈開箱來了！原鑲好香# rolex #116595rbow #daytona factory setting Rainbow Daytona 歡迎諮詢. ... <看更多>