《在職奶媽上班裝備》
因為係在職媽媽，除咗芊羽出世頭兩個月可以全埋身外，呢set嘢已經跟咗Wilma媽7個半月。
我好幸運，印象中係塞過一兩次奶，而返工同事亦好支持我呢個成日霸房泵奶嘅媽咪，甚至乎會提我「媽咪你今日係咪未泵奶呀？」。
喺一個喺泵奶上冇咩壓力嘅環境下，而個囡又細食（一餐都係食5安4安，好少6安）我嘅奶量一直做得到供求平衡，或者比芊羽食其實稍稍多咗少少。（一泵8安至11安，通常一泵就啱啱食2餐）
目前芊羽已經加咗2固。
呢套架撐由每日要出場2次，到宜家一日一泵就夠，我大概預計，再過多幾個月，佢就會退役。
呢度介紹下我嘅好朋友先：
一）冰袋+兩個冰種
冰袋我有兩個，頭幾個月要裝4支奶，而且舊公司雪櫃冇冰格位，我買嘅大冰袋係聲稱Keep倒8-10個鐘
宜家因爲只需一泵，再加上公司有冰格，我只需要用個細冰袋夠擺2支奶就可以。
價錢：冰袋- 幾十蚊至二百幾不等
冰種- 美心月餅或奶泵城有售
二）Cimilre 電雙泵
開頭未知自己有冇奶，Wilma媽淘寶買咗套優合，但實在力度太大，痛到怕面對泵下一次。於是我就買咗呢部Cimilre，佢有分5lv嘅按摩功能，同10lv嘅泵奶力度，非常好用又唔痛，配件亦比優合少。
價錢：$13xx 購自奶泵城母嬰用品店-優合 Cimilre Spectra Medela 奶泵專家-歡迎到門市試機及查詢
三）Maymom 喇叭+ TT樽闊咀轉接環
因為買喇叭必須啱size，唔啱size除咗會唔出奶，仲有機會傷乳腺！
所以我都冇得揀其他牌子咯。
而因為TT樽係闊口樽，我就要另外可再用個轉接環先可以直接泵落樽喇。
價錢：Maymom 喇叭- 一對$150
TT闊口環- 一個$85
其他母乳伴侶就係奶樽、奶袋同密實袋。
其實身邊好多人，包括我婆婆，開始同我講，人奶餵到6個月就冇營養㗎喇！但喺度我又再提提，跟據世衛指引，BB 6個月後係建議配合加固餵哺母乳直到2歲或更長時間。只不過6個月後，BB要開始訓練咀嚼，適應一歲後唔再靠人奶為主糧。
所以呢，作為一個硬頸人奶媽咪，目標依然係自然離乳。
各位母乳媽媽共勉之❤️
如果大家有在職奶媽疑問歡迎一齊討論呢～
